Aizawl 3rd, Nov., 2022 : Vawiin khan Droupadi Murmu, President of India, Visitor of Mizoram University ni bawk chuan khuallian niin 17th Convocation of Mizoram University, Tanhril chu a hman pui a. He hunah hian Larsap Hari Babu Kambhampati, Chief Rector of Mizoram University leh Zoramthanga, Chief Minister te chu khualzahawm an ni.
17th Convocation of Mizoram University hi Prof K.R.S Sambasiva Rao phalna la hmasaiin Prof Lalnundanga, Registrar chuan a hawng a. Vice Chancellor hnen atangin inlawmna thusawi ngaihthlak a nih hnuah zirlai hlawhtling te hnenah Degree, Gold Medal leh Prize te hlanna neih hmasak a ni. Gold Medal dawngtute hnenah President in Medal leh thuziak a hlan chhunzawm a. Hemi hnu hian President Droupadi Murmu chuan 17th Convocation of Mizoram University pualin lawmpuina leh fuihna thu a sawi chhunzawm nghal a ni.
President Droupadi Murmu chuan zirlai hlawhtling thar te chu an thawhrimna rah senga degree tha tak tak an dawng tharte chu a lawmpui a. Heng zirlai hlawhtlingte zinga an subject lak bik theuh a Gold medal la thei te leh Book Prize dawngtute chu chhuanawm a tih a sawi a. Degree nei thar te chu an thiamna leh theihna te khawtlang leh ram hmasawnna atana hmang turin a chah a ni.
India ram Unversity tha zual 100 NIRF in a thlan chhuahah MZU in ranking sang tak a nei chu ropui a tih thu a sawi a. University naupang tak ni mahse, he hmasawnna hian a thawktute inpekna a zarah kawng engkimah MZU in hma a sawn tih a chiang a. MZU chu a hmuhma a nuam a, ramngaw hnuaiah zirna in tha tak tak a awm belh zel a. He campus chhunga hmalakna chu eco-friendly/environmemt friendly ni zel se duhthusam a ni a ti. MZU in research lamah hmasawn zel tuma theihtawp a chhuah leh technical education bakah skill development lamahte tan a la zel chu tha a tih thu a sawi bawk.
MZU chu Unversity tha tehnaah sang chho zel turin theihna a nei niin a sawi a. Tun tum convocation-ah zirla titha filawr thlanchhuah zingah hmeichhia an tam chu ropui a tih thu sawiin kawng tinrengah hmeichhiate hmasawnna tur ngaihtuah a ngai a. India ramah hmeichhia ten hma an sawn a, hmeichhe dinhmun a that chhoh zel chuan India in nasa takin hma a sawn ang a ti a ni.
A hnuaia tarlan ang hian 17th Convocation of Mizoram University degree hrang hrang pek a ni.
Doctor of Philosophy -38, Master of Philosophy – 6, Master’s Degree -469, Master’s Professional (MLIS,MJMC, MBA, MBATH, M. Tech.,M. Pharm, MCA, IMBA, MSW, M.Ed) – 103, Bachelor’s Degree – 109, Bachelor’s Professional (B. Tech., B. Pharm, Nursing, OOT, RIT, MLT, LLB, BBA, B. Arch, B.Voc, BSW, B.Ed MMP, B.Ed.) – 107 niin a hmuna degree dawngtu kal zat chu 832 an ni. A hmuna kal ve thei lo degree dawng zat chu 5994 niin tun tum convocation bika degree dawngtu zat hi zirlai 6826 an ni. Zirlai hlawhtling degree nei thar zingah hian Gold Medalist 52 leh Book Prize Winner mi 16 an awm bawk a ni.
