Nimin November 18, 2022 (Zirtawpni) chawhnu khan Pu Vanlalruata, President chuan party office-ah tun hnai lawka Assam sawrkarin chawimawina a hlan kan Treasurer Pu HK Liansawta chu thingpuiin a lawmpui.
Pu Ruata chuan, “India ramah Hindi a pawimawh telh telh dawn a, Mizoten uar zawka Hindi kan zir a ṭul hle. Kan Treasurer-in India Hmarchhak huapa Hindi tihhmasawnna kawnga thawk ṭha chawimawina a dawng hi a ropuiin ngaihhlutawm ka ti hle a, Mizo mipui tana thil chhinchhiah tlak a tling,” a ti.
HK Liansawta hi India hmarchhaka Hindi hmasawnna tura thawk ṭha chawimawina ‘Assam Rashtra Bhasha Parchar Samiti’ Guwahati-ah Assam sawrkarin a hlan a. Assam state mi 2 leh Sikkim, Meghalaya leh Manipur state-te aṭangin mi pakhat ṭheuh hlan an ni bawk. He chawimawina hian thuziak bakah sum fai a keng tel bawk a ni.
Pu Sawta hian kum 1989 aṭang khan tun thlengin chawl loin Hindi Class IV School siamin a enkawl a, tunah hian BA thlenga zirna hawngin district khawpui hrang hrangah a nei bawk.
