– Rasik Mohan Chakma, MLA & CEM (CADC) chuan, “Hun enge maw chen chu MLA leh CEM ka nih kawp avanga DD Chakma, ZPM MDC-in Governor-a min hekna avangin miten keimah min hmuh dan a danglam a, sawifiah tulin ka hria a ni,” tiin a hnuai a mi ang hian a insawifiah.
“Dan hriat loh vangin mi dik te hmuh dik lohin an awm thin. Kei chuan office of profit chungchangah chuan dan ka hria a, min hekna avangin rilru hrehawmna leh hlauhthawnna pakhatmah ka nei lo. Mahse, min hekna avangin mi tam takin dan bawhchhia emaw min ti a, Election Commission of India (ECI) in dan a rawn sawifiah takah chuan mipuiin rilru dik an put theih nan thudik hi puanchhuah a ngai a ni.
“Office of profit chungchangah hian hman atang tawhin ngaih dan fuh lo a awm a, he ka case chungchanga ECI thutlukna hian mipui min zirtir se ka duh a, Mizoram Assembly dan lo siam ve hmangin office of profit chungchangah MLA te ban theih angin Law Deptt pawhin ‘Dan bawhchhia, disqualify theih’ angin Governor ah observation an siam niin ka hria a.
“Tun hnuah chuan dan hi zir chiang tawh thin se, office of profit chungchang a High court judgement lo awm tawh te leh ECI opinions lo puanchhuah tawh te zir chiang lovin observation siam tawh lo se ka duh a ni. A tawi zawngin Sixth Schedule hnuaia ADC a MDCs/CEMs posts te hi India Dan pui hnuaia office of profit a nih loh avangin MLA nen a nih kawpin office of profit dan kan bawhchhe lo. CEM hna ka thawh avangin CEM hlawh ka la thiang a, MLA hna ka thawh avangin MLA hlawh pawh ka la thiang a ni, thawhhlawh chu la tur reng ka ni e.
“A dawt leha ka sawi duh chu Ex-Minister & Hachhek bialtu MLA, ZPM party in an hekna chungchang hi a ni. A fapa firm in sorkara contract a thawh avanga Pu Roberta hi office of profit dan bawhchhiaa puh a ni a. An puhna points hrang te ECI in a zir chian hnuah Pu Robert Romawia Royte hian dan a bawhchhe lo tiin Governor hnenah Order tichhuak turin December 2023 khan hriattir a ni a, Gazzette pawh a chhuak tawh a ni. He thil ka sawi tel nachhan chu mipui leh party pawhin dan kan hriat loh avangin mi chungah ngaih dan dik lo kan nei palh thei a ni. He judgement atanga lang chiang chu CM/Minister/MLA te fapa, fanu, nupui etc an chenpui ngei te pawhin sorkar ah contract leh supply an thawk thei tih a tichiang a. He judgement a interesting deuh chu Minister/MLA ten consultancy services an tih hi office of profit danin a khap lo tih hi a ni,” a ti.
