Aizawl, April 27 : Prime Minister Pu Narendra Modi chuan vawiin khan India state leh UT Chief Minister/ Lt. Governor te chu Covid-19 hrileng meka an dinhmun leh hmalak zel dan tur chungchangah video-conference a neihpui.
He meeting-ah hian Uttar Pradesh, Mizoram, Karnataka leh Haryana Chief Minister ten thu an sawi a. Mizoram CM Pu Zoramthanga chuan Covid hrileng hmachhawnna kawnga sawrkar laipuiin state a puihna chungah lawmthu a sawi a. State chuan “Test – Track – Treat – Vaccinate and observe Covid Appropriate Behaviour” chu tha taka a kalpui thute, sawrkar policy zawm that avang te, kohhran leh tlawmngai pawl tawiawmna tha tak avang te a case a tlakhniam mek thu sawi bawkin, tun dinhmunah covid-19 vei mek awm zat chu 759 ni mahse, hospital a enkawl mek chu mi 20 an tlin loh thu te, natna dang nei tel (co-morbid patient) ICU a enkawl lai pakhat chauh a awm thu te leh Case Fatality Rate (hri kai zinga nunna chan zat) chu 0.3% chauh a nih thu a sawi. PM CARES hnuaia PSA Oxygen Plants 13 dawn te chu District Hospital-ah te leh Cancer Hospital-a bun fel vek a nih thu leh, heng avanga medical oxygen chungchangah tun dinhmunah harsatna a awm loh phah thu a sawi a. Heng oxygen siamna khawl hi tunah DRDO in enkawl mahse, kum khat leh a chanve ral hnuah chuan state sawrkarin a enkawl chhunzawm tawh tur a sawrkar laipuiin a ruahman avangin, a hun a lo thlen hunah state-te sum leh technical lam puihna pe thei tura a beisei thu Chief Minister chuan a thlen a ni. COVID-19 vaccine pekchhuah dan thu a sawi bawk a. Chief Minister chuan kum 18-59 inkar te tana precautionary dose vaccine pek tur chu sawrkar laipuiin man chawi ngailo a pek theih tura ruahmanna siam se tiin Prime Minister bulah chuan a sawi a. COVID-19 avanga thi ta te chhung hnena Ex-gratia/ compensation chu dilna 624 lut a awm tawh thu te, April ni 24, 2022 thleng khan 596 (95.5%) chu pek ni tawhin, a bak pawk process mek a nih thu a sawi.
Prime Minister Pu Narendra Modi chuan thawhhona tha neih zui zel pawimawh a tih thu a sawi a. He hrileng hi a la reh tak tak loh avangin leh hrileng in harsatna min thlen te hi chinfel vek a la nih loh avangin, nunphung pangngai zawh leh kan tum naah hian kan fimkhur tlan a tul thu a sawi a. Vaccine la thei apiang chuan lak zel ni se, a ti a. Atir te atanga hri vei loh nan leh hri a darh loh nan a hmalak ngaihpawimawh ber a nih chu tunah pawh kan ngaihpawimawh ber a la nih tho thu sawiin, test a, inchhuizui a in enkawl chu theihtawp chhuah a la bawhzui zel tur kan ni, a ti.
He video-conference ah tun hnaia state leh Union Territory te dinhmun leh, ram pum anga hmalak ngaihna lai te Secretary, Health & Family Welfare Ministry chuan presentation a pe a. State leh UT zinga active case nei tam ber pasarih zingah Mizoram chu tel mahse case in tlakhniam lam a pan mek zel a ni.
