Thutak Nunpuitu Team-in Mizo hlangin Tata SK 712 Pro Volleyball League an khel dawn a, nikum final-a an tlawmna chhan let theih ngei an inbeisei.
2016 atangin Pro Volleyball vawi rukna June 2 khian R Dengthuama Indoor Stadium, Mualpuiah tan a ni dawn. Vawi hnih champion tawh Hunthar nen chiah la tel kim vek thei an nih laiin TNT-in harsatna lian tak an nei a, final-ah tum hnih an tlawm tawh.
Coach Lalhmangaihsanga Sailo chuan Mizoram pawn atanga player tha an lak luh ve loh avangin nikum khan a vawrtawpah an hriam tawk lo deuh tih a pha lo va. Final-ah Durtlang North-in 25-20, 23-25, 25-21, 25-23 (3-1)-in Mizo hlanga khel awm chhun TNT an hneh a, a vawi khat nan an champion.
Hmangaihsanga chuan a vawi khat nan Mizoram volleyball inelna sang berah champion an tum tih a sawi a; chutih rualin state pawn atanga player tha la lut chuang lovin an neih sate tha zawka chhawr theih tumin an inpuahchah.
2022 Pro Volleyball Mizo player tha ber Vanlaltanchhana leh tunlaia hmasawna tak Zosangzuala an kawl a, TNT coach chuan : “Kuminah tha zawk, nghet zawk leh tlo zawk turin kan inbuatsaih a, Pathian rin chhan chungin champion thei tura khawpa kan khelh theih ngei kan ring a ni,” a ti.
TNT sports incharge Pu Lalzawmliana chuan rawngbawl nan volleyball an kalpui tih a sawi rualin, senso a hautak avang leh chhan dang avangin team tichak turin Mizoram pawn atangin player tha an la lut dawn lo tih a sawi.
Mizoram volleyball hmunpui pawimawh TNT mipa team hian Pro Volleyball an khelh hnuhnun berah an hneh loh Durtlang North hmachhawnin league bul an tan dawn a, kar leh zirtawpni, championship hawn zanah an tlawmna chhan let tumin khelmual an lut ang.
TATA SK PRO VOLLEYBALL LEAGUE 2023
TNT FIXTURE
JUNE 2 (ZIRTAWPNI)
08:00 pm : v Durtlang North
JUNE 12 (THAWHTANNI)
08:00 pm : v Tuichangral
JUNE 14 (NILAINI)
08:00 pm : v Tuipuiral
JUNE 16 (ZIRTAWPNI)
08:00 pm : v Chhinga Veng Spikers
JUNE 21 (NILAINI)
08:00 pm : v Hunthar
