Kananin fiahna pawimawh pal tlangin ninganiah set thum set khatin champion lai Bethlehem Vengthlang an hneh a, Tata SK Pro Volleyball League vawi hnih an khelh tawhah an chak ve ve.
R Dengthuama Indoor Stadium, Mualpuiah Kanan player paliin point 10 leh aia tam an thawk chhuak a, 25-20, 25-17, 22-25, 25-23-in Bethlehem Vengthlang an hneh.
Team pahnih tan Serkawn Lunglei player ve ve an langsar a, Kanan spiker Laltleipuii Renthlei chuan point 16 hmuin tum li chiah a tisual a, a vawi khat nan D3 Business Player of the Match-a thlan a ni.
2022 Pro Volleyball player tha ber Elisian Medai chuan vawi 19 vaw tla mah se point riat a hloh a, Bethlehem Vengthlang tan a khelh tawhah a tum khat nan an tlawm a. Veng khata a chenpui Tleipuii’n boruak thar hapin hun chhinchhiahtlak a hmang ve thung.
Durtlang laka set hloh lova chak tawh Kananin inkhel hautak zawk hmachhawn mah se player tinin rin ngamin an khel a, harsatna lian tawk lovin set hmasa pahnih an la a, tlang nghal thei mai turin inkhel an thunun.
Bethlehem Vengthlang an insiam tha a, Elisian-i leh VL Hmangaihzuali’n team fuih phurin Kanan tanhman a phet a, set thumna la ve thungin set la zawn zui thei turin 21-16-in hma an hruai zui leh.
Mahse, inelna sangah hriam takin Kananin an inlan a, tawn hriat ngah B Tlangmawii Varte chuan hun khirhah tum thum hlap tlain inringtawk zawkin an nawr let thei.
23-20-a hmahruai tawh Bethlehem Vengthlang dang betin Tleipuii’n point pawimawh a hmuh hnuah 23-23-in an nih rual. Champion lai talbuaiin Lalbiakngheti’n a vaw tla zawn a, Kananin a tawp point li hmu zawnin phu takin an chak.
Vawi hnih an chak zawn hnuah semifinal lut thei tur dinhmun thaah Kanan an inhung zui. Tleipuii bakah lehlam vuak dangtu ber Lalramliani’n point 18 hlawh chhuakin Tlangmawii’n point 11 a hmu bawk a, point sarih ve ve an hloh.
Biakngheti’n point 10 a hmuh chanve chiah a paih a, Durtlang an hneh tuma khel tha bera thlan Lalhriatpuii’n vawi kua vaw tlain tum nga a tisual. Kananin danglamna siam thei player an nei ngah a, June 16-ah Power nen an inkhel leh dawn a ni.
Bethlehem Vengthlang tan Zuali’n point 13 hmuin tum riat a tisual ve thung a, Elisian-i thlawp thei ber niin captain CS Zonunmawii’n point 10 a thawh chhuah laiin point 14 a hloh a; hnehna kawnga kir leh tumin inrinniah Luangmual nen an inhmachhawn dawn a ni.
RESULT
June 8, 2023 – Ningani
Kanan bt Bethlehem Vengthlang (hmeichhia)
– 25-20, 25-17, 22-25, 25-23 (3-1)
D3 Business Player of the Match
– Laltleipuii Renthlei (Kanan)
Stats
KANAN
Laltleipuii Renthlei : point hmuh 16, point hloh 4
Lalramliani : point hmuh 18, point hloh 7
V Tlangmawii Varte : point hmuh 11, point hloh 7
Lalbiakngheti : point hmuh 10, point hloh 5
Lalhriatpuii : point hmuh 9, point hloh 5
BETHLEHEM VENGTHLANG
Elisian Medai : point hmuh 19, point hloh 8
VL Hmangaihzuali : point hmuh 13, point hloh 8
CS Zonunmawii : point hmuh 10, point hloh 14
Elina B Lalenkawli : point hmuh 3, point hloh 3
Lalchhandami : point hmuh 3, point hloh 7
FIXTURE
JUNE 8 (NINGANI) :
04:30 pm : Chhinga Veng Spikers v Tuipuiral (mipa)
08:00 pm : Hunthar v Tuichangral (mipa)
JUNE 9 (ZIRTAWPNI) :
03:30 pm : Bungkawn v Durtlang (hmeichhia)
JUNE 10 (INRINNI) :
03:30 pm : Luangmual v Bethlehem Vengthlang (hmeichhia)
08:00 pm : Durtlang North v Hunthar (mipa)
