Leithum tlangval Michael Lalfinga leh Khuangthing chhuanvawr Lalpianpuia bula khel turin Tuipuiralin Karnataka atangin Sujith Kumar an la lut.
Farkawn khuaah Tata SK 712 Pro Volleyball League khel turin nikuma din Tuipuiral Volleyball Club an inkulh mek a; Mizoram volleyball inelna sang bera an tel vawi khatnaah a tikimtu ringawt nih an duh lo.
Mizoram khaw chhak tlang dungin kumin hian an infiamna kutpui ber Tuipuiral Games kum 50-na an hmang. He hun bik hian an la tawn ngai loh Pro Volleyball khel tur Tuipuiral a tiphur a, Dubai, Maldive leh Oman club hrang hranga volleyball khel tawh Sujith an biak fel rualin phurna nasa leh zual an neih phah.
Sujith hian 2019 Pro Volleyball champion Chhinga Veng Spikers tan khel tawhin 2018 MVA Invitation-ah a champion-pui a, nikum khan Pro Volleyball khel bawkin Tuichangral pawhin season hawnna tournament-ah an hmang a, state pawn player zinga Mizorama tawn hriat nei ngah a ni.
Kai thar Tuipuiralin Pro Division-a season khat an hman mekah tournament vawi hnih khel tawhin awmzia an nei zo lo va, club an din ruala an beisei ber Pro Volleyball-ah tel thei lo mai tur dinhmun derthawngah an awm hman nghe nghe.
Khaw hrang hranga awm an nih avangin inkoh khawm leh inpuahchahna chungchangah harsatna an tawk a, hruaituten player indaih lo leh inbuatsaih mumal lo chunga tel hrim hrim an duh lo.
Theihtawpa hma an lak hnuah Farkawnah inko khawmin captain Finga leh assistant captain Pianpuia hovin an inpuahchah a, an mamawh chhanna leh team tichaktu ni ngei turin Sujith an beisei.
2018 khan Tuichangralin a vawi khat nan Pro Volleyball khel tawhin Aizawl pawn atanga tel hmasa ber an ni a, season khat an hmannaah final lut nghalin Hunthar an pal tlang zo lo a ni.
Pro Division-ah Tuichangral awm zui zelin Tuipuiral an tel ve leh rualin Pro Volleyball chanchina a vawi khat nan Aizawl pawn team pakhat aia tamin title an chuh dawn.
June 8-ah Chhinga Veng Spikers nen inkhelin Tuipuiralin league bul an tan dawn a, Tuipuiral Game and Sports Association chuan duhsakna sang ber an hlan.
TATA SK 712 PRO VOLLEYBALL LEAGUE
TUIPUIRAL FIXTURE
JUNE 8 (NINGANI) :
03:30 pm : Chhinga Veng Spikers v Tuipuiral (mipa)
JUNE 14 (NILAINI) :
08:00 pm : Tuipuiral v TNT (mipa)
JUNE 17 (INRINNI) :
08:00 pm : Hunthar v Tuipuiral (mipa)
JUNE 20 (THAWHLEHNI) :
08:00 pm : Tuipuiral v Durtlang North (mipa)
JUNE 22 (NINGANI) :
08:00 pm : Tuichangral v Tuipuiral (mipa)
