Kananin fuh takin Tata SK Pro Volleyball League bul an ṭan a, thawhṭanni zanah set hloh lovin Durtlang an hneh.
R Dengṭhuama Indoor Stadium, Mualpuiah Kananin mi mal leh team inel hrang hrangah Durtlang an hnuaichhiah a, 25-16, 25-17, 25-10-in an tlang.
Mi mal innghahna bik nei lovin setter tawn hriat nei FVL Hmuchhuaki’n Kanan player tute pawh danglamna thlen thei turin hun ṭha a siamsak a; ball an hmuh chinah Lalbiakngheti’n fel fai takin a khel a, point 10 thawk chhuakin ṭum khat chiah a tisual a, D3 Business Player of the Match-a thlan a ni.
Inkhel an ṭan rualin 1-0, 2-1-in 2019 champion Durtlang an sang a, a hnuah Kanan um tluan zakin sang zawk nih lai an nei zui tawh lo va. Set la ve tur khawpin ball vuak leh thiamna hrang hrangah an elpui an pha lo.
Kanan coach Eric Lalsangliana Pautu chuan Mizo hmeichhe inkhela an chin ngai loh thiamna entir an tum tih a sawi lawk a. Hmuchhuaki’n kil tinah ball thui leh tawi, a sang leh hniamin a siamsak a, inzuan thuah pahin Biakngheti bakah Lalramliani, R Laltleipuii leh Lalhriatpuii ten nuam ti takin an vua.
Hriatpuii’n point kua hmuin ṭum nga a tisual a, Rami’n point sarih hlawhin point nga a hloh a, Tleipuii’n vawi sarih vaw tlain ṭum nga bawk a tisual. Anni bakah hian B Tlangmawii Varte chuan point thum hlohin point sarih a hmu a, a tira paruk lut zinga tel lo C Lalnunpuii’n point nga vaw chhuakin ṭum hnih a hloh.
Durtlangin an chet chhiat an chhunzawm ve thung a, 2019 final-a Bungkawn an hneh hnuah chak an nei zui leh miah lo. Khelh li an tlawm zawnna niin Lalpekhlui’n point 10 hmu tling mah se point sarih a paih a, el tham ni turin team pum puiin hmasawn an mamawh.
Pro Division season kal mekah inelna vawi hnih awm tawhin Kanan an champion ve ve. An duhthusam tifamkim turin Mizoram inelna sang berah bul an ṭan ṭha a, ningani chhunah an nihna dik tak lantir thei tur fiahna hmachhawnin champion lai Bethlehem Vengthlang nen an inkhel dawn a, tunkar inrinniah Durtlangin Bethlehem Vengthlang tho an khelhpui ve leh ang.
Stats :
KANAN
Lalbiakngheti : point hmuh – 10, point hloh – 1
C Lalnunpuii : point hmuh – 5, point hloh – 2
Lalhriatpuii : point hmuh – 9, point hloh – 5
R Laltleipuii : point hmuh – 6, point hloh – 4
Lalramliani : point hmuh – 7, point hloh – 5
B Tlangmawii Varte : point hmuh – 7, point hloh – 3
DURTLANG
Lalpekhluii : point hmuh – 10, point hloh – 7
Emily Lalramsangi : point hmuh – 7, point hloh – 5
Lalrinthangi : point hmuh – 5, point hloh – 3
Vansangpuii : point hmuh – 2, point hloh – 2
FIXTURE
JUNE 6 (THAWHLEHNI) :
08:00 pm : Luangmual v Power Department Sporting Club (hmeichhia)
JUNE 8 (NINGANI) :
01:30 pm : Bethlehem Vengthlang v Kanan (hmeichhia)
03:30 pm : Chhinga Veng Spikers v Tuipuiral (mipa)
08:00 pm : Hunthar v Tuichangral (mipa)
