Aizawl Mayor Lalrinenga Sailo chuan, “AMC-in property tax hmangin Aizawl mipui an rawk mek ti a thudik lo tih than in a awm mek niin a lang a, hetiang a thudik lo tak mai thehdarh a ni leh a thalo zawnga mipui rilru kaihruai thei thil a thleng hi Aizawl Municipal Corporation chuan pawi a ti tak zet a ni,” a ti.
Vawiin khan Lalrinenga Sailo chuan AIzawl Press Club-ah chanchinthar lakhawmtute kawmin, “Kumin record a a lan danin Aizawl khawpuia in (building) ding 45000 survey zinga 60% in Rs. 500/- emaw a aia tlem emaw an chawi a, 12% in Rs. 500/- atanga Rs. 1,000/- inkar an chawi a. 22% te hian Rs. 1,000/- atanga Rs. 5,000/- inkar an chawi a, a dang 6% te hian Rs. 5,000/- chung lam an chawi a ni. Hei hian mipui tana phurrit lo tur ang bera duan a ni tih a tar lang chiang hle.
“Property tax hi kum kal ta khan Rs. 3.2 crores lak luh a ni a, hei hi Aizawl khawpuia cheng mi pakhatin Rs. 100/- vel chawi ang zela ngaih theih a ni a, khawpui danga property tax dinhmun te nena khaikhin chuan a tlem hle a ni,” a ti.
“15th Finance Commission recommendation anga Property Tax chungchangah hma lak a nih loh chuan pawisa pekchhuah a nih loh tur thu hi Operational Guidelines for implementation of the recommendations of the Fifteenth Finance Commission (XV-FC) on Urban Local Bodies (ULB) grants contained in Chapter 7 of FC-XV report (Empowering Local Governments) phek 12-naah chiang takin tarlan a ni.)
“Kum sarih liam ta 2015-16 atang khan Aizawl khawpuiah property tax hi khawn tan a ni a, he kum sarih chhung hian mipui phur rit tur venthawn vangin Central sawrkar nawrna nasa tak hnuaiah tax hi vawikhat mah tihsan a la ni lo. Amaherawhchu, Central lam atanga nawrna a nasat tak avangin kumin hian tihsan a lo ni ta a, mipuite pawhin kan hrethiam tlang ni a hriat a nih avangin a lawmawm hle a ni. Kumina tax chawi pung thut anga lang leh sawi te hi a tlangpuiin in sak belh vang te, kum hmasa lama data dik tawklo hmanga tax lo pek thin, data dik zawk neih a nih taka chawi tur pangngai lo lang ta a nih vang te a ni a, a dik taka lo pe thin tan chuan a san belhna hi a tam lo hle a ni.
“Property Tax khawn tan a nih khan self-assessment a kalpuiin, a neituin a in len zawng te, a hmanna te, a sak phung te leh property tax chhutna atana mamawh hrang hrang AMC-ah a thehlut a, chumi hmang chuan property tax pek a ni thin a. Mahse, data dik tawklo a awm ni a a lan avangin kum 2016-ah leh kumin kum tir khan AMC thawktute leh Local Council member ten Aizawl khawpuia in zawng zawng survey hna an thawk chhuak ta vek a, hei hian property tax chhutna dik zawk siamin a diklo engemaw zat te tan Tax pek tur dik a lo lang ta a, thenkhat an tlak hniam laiin thenkhat erawh an pung ta thung a nim” a ti
“Congress party-in thuchhuah a siamah hian nasa taka property tax pung niin tarlan a ni a, a thenah phei chuan 2221.79 % a pung angin sawi a ni hial a ni. 2221.79% a pung nia an tarlan Kanan Local Council area in ding hi 4th May 2016 khan survey a ni a, hetih lai hian Ordinary Building niin a chhawng a neilo bawk a, a len zawng hi 27ft x 24 feet a ni a, property tax Rs. 53/- a chawi a ni; he in vek hi 17th October 2018 khan survey that leh niin permanent building chhawng thum (3) a lo sa zo tawh a, a tax chawi pawh Rs. 780/- ah a pung ta a, hei hi 2021-22 thlengin a pe chhunzawm a ni. Ni 9 March 2022 ah survey neih leh niin hemi tum hian chhawng 8 laia sang a lo ni tawh a, chumi anga tax hi chhut that leh niin Rs. 18,110/- a chawi a lo ngai ta a ni.
“437.71% a pung ni a tarlan UPIN: A053561 hi ni 5.8.2016 ah survey niin, hetih lai hian a in hi chhawng khat, a dung 16 feet leh a vang 11 feet a ni a, Property tax Rs. 128/- a chawi a, ni 2.3.2022 ah teh that a nih hnuin a in hi chhawng 5 a lo ni tawh a, Rs. 6,682/- a pek a lo ngai ta a ni.
“389.48% a pung a sawi UPIN: A020817 hi ni 3.5.2016 ah survey a ni a, hetih lai hian a in hi chhawng 4 a ni a, Rs. 1,198 a chawi a; ni 21.4.2022 ah teh that a ni a, a in hi chhawng 5 a lo ni ta a, teh that a nih hnuah hian a in sangzawng leh a hman dante a danglam tak avangin Rs. 5,864 a chawi a lo ngai ta bawk a ni.
“Property tax chungchanga hriatchian duh neite chuan AMC Office, Property Tax Section-ah office hour chhungin zawhfiah theih reng a ni a, tax chhut dan pawh langtlang takin hrilhfiah theih a ni bawk e.
“Property Tax pe lote hian Sawrkar leh Aizawl Municipal Corporation in service/ hamthatna a pekchhuah hrang hrang dawn dawnin harsatna an tawk thei dawn a, entirnan – insak dil turte chuan property tax an pek ngei a ngai; chuvang chuan Property Tax hi mitinte pe theuh turin kan in ngen a ni,” a ti bawk.
