Vawiin April ni 21, 2023 (Zirtawpni) hian Mizo Hnamrun chhung inkhawm neih a ni a. He hunah hian K. Vanlalvena, MP (RS) MNF National Core Committee member (NCC) ni bawk chuan thusawiin, “Pu Laldenga khan India atangin mipui min hruaichhuak lo a, kan rilru a hruaichhuak a ni. Independent sual kha kan tih tur dik tak, kan chanvo chang tura kan beihna a ni. Independent movement kha awm lo se vai hmingpu kan tam tawh hle ang. Indian nationalism atangin Mizo nationalism-ah min hruailut ta a ni. Kan hnam innghahna kulhpui ber chu vai ngaihsan lohna a ni ta. Pathian remruat ang zelin, tharum thawha hrehawm tawrh reng rem ti loin, remna kawngah min hruai ta a ni, “a ti.
K. Vanlalvena chuan, Rom 13:1 a ziak angin, roreltu te hi Pathian ruat an ni a, hei hi tunhma atanga tun hun leh hun lo la awm tur thlengin a dik dawn. Mizoram politics-ah pawh Pathian min hruaina a dik chat chat zel a ni. Kan hun tawn a zir zelin Pathianin roreltu min pe thin, a ti.
MNF NCC member chuan, Covid avanga kan economy tlakhniam zia hi a raptlak takzet a. Khawvel ram ropuite pawh an talbuai a. Kan ram ngeiah pawh mipui kan rethei a, kan la tuar mek a, kan mangang a ni. Kan sorkar leh dan tur ngaihtuahna ai pawhin mipui retheihna dawmkan dan tur kan ngaih pawimawh hmasak zawk a tul a ni, a ti bawk.
