Vawiin khan Dampa Bialtu MLA, Pu Lalrintluanga Sailo vuina, a chenna in, Luangmuala buatsaih, official programme-ah House Leader Pu Lalduhoma, Chief Minister chuan thu a sawi.
Pu Lalduhoma chuan, House leader a nihna leh an party aiawha ding a nih thu a sawi a. Mizoramin sitting MLA hi mi 10 kan chan tawh niin ka hria a. Vawiina kan vui mek Pu Lalrintluanga Sailo hi legislator tha, debater ropui tak a ni. Ka nau a ni a, a hmingin kan ko mai, Pu kan belh ngai lo. Kan nupa hi u angin min en a, kan ngaina em em a ni. 1993 a Bilkhawthlir biala ka zuk din khan ka campaign Chairman a ni tluan zak a, kan riak dun zel thin. Tunah kan han MLA dun a, Session-a kan han che vel te hi mi inhal tak emaw min ti mai thei. Mahse a ni lo, kan innel em em zawk a ni, a ti.
“Assembly Session-a a thusawi hnuhnung te nizanah ka thlirlet a, ka lung a leng hle a, lawmthu sawiin a thu hnuhnung te kha a khar a ni”. A nupui fanaute lo thlaphang lo ula, thian tha tam tak in nei tih hria ang che u. Sawrkar pawhin a tih theih apiang a ti dawn a ni, a ti.
Pu Lalfamkima, Deputy Speaker pawhin thusawiin, Pu Lalrintluanga Sailo chu pa tha tak, mite khawngaih thei tak, nelawm tak a ni. Ram tana a thahnemngaihnate kan hre reng dawn a, a tel lo va Assembly House kan han kalpui tur hi ka huphurh hle, a ti a. Delhi-a cham mek Speaker Pu Lalbiakzaman a rawn thlahna thuchah a sawi bawk.
MNF Legislature party aiawhin Pu Lalchhandama, Leader of Opposition chuan thu a sawi a. Pu Lalrintluanga Sailo chu an legislature party Deputy Leader a nih thu tarlangin, kan party chhungah leh party dang kan thiante nena kan inpawhtawnna kawngah a thawhhlawk hle a, kan ngaina vek a ni. Lehkha zir sang tia sawi tlak ni lo mah se mi fing a ni, a ti.
MLA ni lai a nih angin Pu Lalthangmawia, Addl. Secretary, Mizoram Assembly Secretariat chuan Mizoram sawrkarin Pu Lalrintluanga Sailo a sunna Gazette a chhiar chhuak a. House a a thusawi zat te a tarlang bawk.
