Dated Aizawl 7th December, 2024 : Vawiin ni 7 December, 2024 (Inrinni) hian Pu Vanlalhlana, Minister, PWD chuan Tlawng lei dawh mek chu a hmunah kalin a tlawh a, hnathawktu leh PWD hotute nen chak zawka hna thawh dan tur leh mipui tana harsatna awmte sutkian dan tur an sawi ho.
Pu Vanlalhlana chuan, “Mizoramah lei kan neih tawhte hi upa tawh tak tak an ni a, kan lei tam zawkte hi Suspension Bridge leh Bailey Bridge te an ni a, tunah lei thar dangdai tak mai kan nei tur hi a lawmawm hle mai a, mipui ten tangkai taka kan chhawr ka beisei a ni,” a ti.
“Mizorama kan lei te hi a tlo lo hle thin a, a chim fo mai a, tuna kan lei dawh mek erawh hi chu fimkhur tak leh uluk taka dawh a ni a, chuvang chuan a thawh chhung pawh hi a rei lo thei lo a ni. He lei dawh hna hi March ni 7, 2021 khan tan a ni a, thawh zawh hun tura bituk chu October ni 22, 2023 a ni a, an zawh hman loh avangin ni 209 pawhsei leh a ni. Uluk leh fimkhur taka hna thawh a nih theih nan leh a rang thei ang bera he lei hi zawh a nih theih nan road block te kan siam a, hei hian harsatna a siam lo thei lo a, amaherawhchu thil tha zawk a lo chhuah theih kan beisei vanga ni a, mipuite pawh lo dawh hram hram turin ka ngen nawn leh duh a ni,” a ti bawk.
PWD Minister chuan, “Tuna kan lei dawh mek hi Mizoram tan hian a pawimawh hle mai a, Mizoram khawpui leh khawthlang lam inthunzawmna kawng pawimawh tak a nih avangin leh kan Airport neih chhun kawng a nih avangin pawl hrang hrangte pawhin ngai pawimawhin a hmunah an tlawh fo thin a, kan lawm em em a ni,” a ti.
“Kei ngei pawh hian vawi 4 ka tlawh tawh a, thawktute pawh hna tha tak leh chak zawka thawk turin ka chah fo thin a ni. Thawktute pawhin theihtawp an chhuah thu leh mipuite dawhtheihna avangin lawmthu an lo sawi ve fo thin a ni. He lei hi ram rohlu tling tur a nih avangin a enkawl zuina lamah pawh mipuiten duat taka kan enkawl a ngai dawn a, ZPM Sawrkar hnuaiah chuan eng hna pawh ni se a tha tur a ni kan ti thin a, Company hna a ni emaw, mimal leh Contractor hna pawh ni se, State Monitoring Committee ten uluk takin an thawh lai leh an thawh zawh hnu thleng pawhin a theih chin chinah an vil reng dawn a, hemi kawngah pawh hian mipuite thawhpuina Sawrkar chuan a mamawh reng dawn a ni. Tunlai ah social media a chak tawh a, heng hmangte hian sawrkar hnenah kan khawtlang leh a chhevel a hnathawh tha leh tha lo te kan hrilh hre zung zung thei a ni,” a ti bawk.
