Pu Zoramthanga kutah Mizoram sum leh pai a him lo : MPCC

MPCC chuan, “Zoramthanga kaihhruai MNF sorkar hi a tlaran zawnga a chet avangin Mizoram sum leh pai dinhmun pawh ICU-ah hial dah alo ngai ta a, Treasury khar hming pu ngam si loin Sorkar Treasury te hian pawisa pek chhuah tur an nei lova. Heti khawpa kan sum dinhmun a chhiatna chhan chu State khat chhungkaw Pa ber, Chief Minister in inrenchemna awm miah lova mipui pawisa (public money) a duhsak zawngte nena inthuruala a hman teuh teuh vang a ni.
“Kum 2008 a Congress party in Pathian leh mipui zara sorkarna kan siam khan sum dinhmun sawngnawi tak kan rochung a. Chumi siam that hna chu kum 2/3 chhung leka thawh zawh theih a ni lova; duhthusam pawhin kan siam tha hman bik lo chungin, theihtawp kan chhuah zarah kum 2016-17 Budget kha State kan nih hnua Surplus Budget kan neih theih tan kum a ni,” an ti.
Inrinni khan Dr.Lallianchhunga, MPCC Media Deptt. Chairman chuan, Aizawl Press Club-ah thuthar lakhawmtute kawmin, “Kum 2016 June 30 hnuah RBI atanga Ways & Means Advance (WMA) a pawisa puk ngai lo khawpin Mizoram sum dinhmun a tha chho a ni. MNF sorkar hi cheng vbch 700 chuang kan hnutchhiah thei a. Surplus Budget (Revenue Surplus) hi a san lai ber kum 2018-2019 phei kha chuan leiba neih belh miah loin, puk belh miah loin, hma thar lakna tur kha cheng vbch 2500 chuang kan nei a ni. Revenue Surplus hi MNF sorkar hnu kum 2019-2020 atangin a tlahniam nghal a. Kum 2020-2021 ah Revenue Surplus cheng vbch 763 nei turin an intarlang (project) a, mahse cheng vbch 799 in an Deficit leh si a ni; a awmzia chu vbch 800 dawnin an chawibelh tihna a ni. Kum 2021-2022 ah Revenue Surplus cheng vbch 579 nei turin an inlantir leh a, vbch 188.41 in an Deficit leh a. Kum 2022-2023 hian Revenue Surplus vbch 1419 awm turin an chhut leh a, hei pawh hi mipui hmuha lan mawi tumna mai a ni.
“Mizoram sorkarin sum leh paiah harsatna a tawh nasat avangin PMGSY hnuaia kawngpui laih mek pawh nasa takin a thuanawp mek a. Nikum December ni 15, 2021 (Nilaini) khan Govt of India, Ministry of Rural Development, Deptt of Rural Development, Rural Connectivity Division chuan Mizoram Sorkar hnenah, PMGSY hnuaia hnathawhte, PMGSY I & II te chu September 2022 (kumin) a tawp vek tur a nih a hriattir a. Kumin April ni 22, 2022 (Thawhlehni) khan Central atang bawkin Allocation of Funds Under PMGSY for 2022-2023 (Tun kum Financial Year kal lai a PMGSY a kan sum hmuh tur) Mizoram Sorkar hriattir a ni a. Kumina PMGSY atana kan sum hmuh tur zawng zawng chu Vaibelchhe 290 a ni.
“Kumin Financial Year atana PMGSY a kan sum hmuh tur 290 Crore atanga 1st Installment Rs. 70.8675 Crore chu ni 1 July 2022 khan Mizoram Sorkar hnenah pek a ni a. He sum hi ni 15 chhunga Mizoram State Rural Roads Development Agency (MiRRDA) hnena pek nghal tur a nih laiin, MNF Sorkar hian pe mai duh loin a hren khawtlai sak a. Cheng vaibelchhe 70 hman zawhna Utilisation Certificate thehluh hnuah a bak hi a tahtawla release zel tur a ni a. Hei hi an pek chhuah theih loh chuan PMGSY sum lo kal zel tur a awm thei tawh dawn lova ni. PMGSY contractor te hian bill an lak theih lohna a rei tawh a. Loan hmanga lei laihna khawl an lei te pawh an rulh theih loh avangin an loan lakna ten an hrensak a, an mangang takzet tawh a. He sum hi thil dangah pawt peng tawh lova, Congress Sorkar laia Contractor-ten an hna thawh tawh sa Bill an lak thuai thuai ang khan Release vat se kan duh takzet a ni,” a ti.
Dr.Lallianchhunga chuan, “MNF party hotute chuan Mizoram sum dinhmun chhia hi thup an tum nasa hle a, kan dinhmun a tha niin an la sawi lui reng a ni. Kan sum dinhmun hi a tha a nih chuan sorkar hnathawk hlawh a hun takah pe sela, an GPF hrensak tawh lo se, pension a chhuakte hnenah pension sum pe nghal bawk sela, Contract bill tang zawng zawng leh Health Care hnuaia damlo bill tang zawng zawng pe vat rawh se.
“Mizoram sum dinhmun chhe ta lutuk hi Home Minister emaw, Sports Minister-in emaw an sawifiah chi a ni lo a, Finance Minister Pu Zoramthanga ngei hian thil awmdan dik tak sawifiahna – White Paper a tichhuak ngei tur a ni zawk. Treasury-ten chawlhkar khat chuang pawisa an pekchhuah theih tawh loh laia Finance Minister-in engmah a la sawifiah duh lo hian a mawhphurhna a lak thutak lohzia a tilang chiang hle a, Pu Zoramthanga’n Mizoram sum dinhmun a sawi thin dan hi nuihpui chi a ni tawh lo a; thinrim nachang kan hriat a hun tawh zawk a ni.
“Mizoram sum leh pai dinhmun chhe lutuk siam tha a, khaichhuak turin sum leh pai enkawlna lama mithiam, mi hmingtha hi kan mamawh takzet a ni.,” a ti bawk.