ABCI Infrastrcture Pvt Ltd. te lung lakna, Quarry pakhat Maudarh a mi chu vawiin tlai dar 3:30 vel khan chimin hnathawktu mi 10 – 15 bakah Excavator 5, Crusher 1 leh Drilling Machine 1 a chhilh niin hriat a ni a, chanchin buatsaih lai (Nov 14. Monday zan dar 7:45) hian mi tlawmngai ten chhanchhuah hna an tawk mek a, chhanchhuah an la awm lo a ni.
Hnahthial leh Dawn inkar kawngpui (NH 54) siam hnathawk mektu ABCI Infrastrcture Pvt Ltd. te lung lakna Quarry chim hi Maudarh khawchhung atanga chhak lam, Kilometre 2 vela hla niin Metre 50 bial vel a chim a ni a, hnathawktute hi hnam dang vek nia hriat an ni.
Chhiat tawhna hmuna awm mek Dr.Lalramdintluanga SDC Hnahthial atanga thu dawn danin, Hnathawktute hian hna an thawh mawp mawp lai, inralrinna pawh awm hman lovin a chim niin a bul hnaia hnathawktu dang awmte chuan an sawi a, mi 10 atanga 15 vel a chhilh rin a ni a. Chhanchhuah hna hi thawh nghal niin Hitachi 4 leh JCB 2 ten leivung haidarh hna hi thawk mekin, Chanchin buatsaih lai hian khawl leh mihring a chhilh te hi haichhuah ala awm lo a ni.
Chhiat tawhna hi hriat a nih velleh District Administration atangin SDC 2- Dr. Lalramdintluanga, Betty Lalrinfeli ten a hmun an pan nghal a, an awmchilh mek a ni. Hei bakah hian Hnahthial SP Vineet Kumar IPS, Addl SP Bijoy Gurung, YMA Sub-Hqrs Hnahthial hruaitute leh YMA Peniel Branch ten an thutchilh bawk a ni.
Update : Tukin (Nov.15) dar 7:00 thleng khan Ruang hmuh tawh zat 8 niin ṭhenkhat chu an taksa a him dam tawhlo hle a, tunah hian a zawn hna thawh chhunzawm zel niin, a delh zat hi mi 12 niin thudawn a ni. Quick Respone team MAP Lunglei leh BSF ten a ruang lak chhuah hna an thawk mek a ni. Tin,YMA Leite Branch ten a hmunah an vil reng bawk a, kuang siamin an la buai hle bawk.
