Nimin tlai a Hnahthial district Maudarh khua a lunglakna hmun chim a thi zat chu 12 ni a hriat a ni a, ruang 8 an la chhuak tawh.
Hnahthial district bawrhsap R. Lalremsanga sawi danin nizan khan tlaivarin ruang zawn hna hi thawh a ni a. Vawiinah pawh chhunzawm zelin ruang 8 hmuhchhuah tawhte hi – Surjit Roy (26), Cachar, Assam; Madan Das (25) Nadia, West Bengal; Rakesh Biswas (21), Nadia, West Bengal; Mintu Mandal (22), Nadia, West Bengal; Buddhadeb Mondal (25), Nadia, West Bengal; Khemlal Kumar (22), Jharkhand; Omprakash Kumar (18), Jharkhand leh Subrata Raptan (24), North 24 Parganas, West Bengal te an ni a. An ruang hi Hnahthial district hospital-ah post examination tih tura lak a ni tawh a. An khaw lam theuh a an ruang dah thlen dan tur chu a chhawrtu Anupam Bricks and Concrete Industries Limited thuneitute’n an buaipui dawn a ni. Nizan dar 9:40 ah ruang hmasa ber an phawrh a, an phawrh hnuhnun’ ber hi tukin dar 2:45 a ni.
Ruang hmuh tawh mi 8 te hi post-mortem examination tih zawh a ni tawh a, an zinga mi 7 te hi Kolkata lamah thawn an ni dawn a, zanin hian Aizawl lamah rawn phur pheiin naktukah thlawhna a thawn tur a ni dawn a. Pakhat hi Lunglei District Zawlpui lamah thawn a ni bawk ang. Ruang la hmuh loh 4 te hi zawn chhunzawm zel an ni ang. BCM Headquarters chuan thi te ralna atan hian cheng sang thum theuh a hlan a, Leite Branch YMA hnenah cheng sang thum a hlan bawk. ABCI Infrastructures Pvt Ltd lam pawhin hnathawhna hmuna boralte hi cheng nuai khat theuhin a ral dawn niin K. Lalremruata, LO ABCI Infrastructures Pvt. Ltd. chuan a sawi.
Tun thlenga ruang la hai chhuah loh ni a hriatte chu – Ajoy Chakma (25), Khojaisuri, Lunglei district; Shofiqul Islam (26), Goalpara, Assam; Jahidur Islam (27) Barpeta Assam leh Kahamrai (49), Zawlpui, Lunglei district te an ni a. Leiminin a chhilh ruang la hmuh lohte zawn hna hi thawh chhunzawm zel a nih thu Hnahthial bawrhsap chuan a sawi.
Nizanah khan ABCI company hnathawkte leh an khawlte bakah Leite leh khaw thenawm amite, NDRF Aizawl, BSF Lunglei Melte, 2nd Batallion MAP Lunglei, Assam Rifles ten an pui a. A hmunah hian Hnahthial Bawrhsap R. Lalremsanga, Addl SP Bijoy Gurung, Magistrate, Medical Team, Khawtlang Hruaitu VC te, YMA hruaitu bakah YMA member leh company hna thawktu mi thahnem tak an awm a ni. Nizan atang khan YMA Leite Branch chuan a hmunah vilin kuang an siam nghal a ni.
Hetihlai hian he thil thleng chungchang hi Disaster Management & Rehabilitation Department chuan vawiin khan Mizoram sorkarah thil thlen dan chungchang report a thehlut a. He chhiatna rapthlak hi November ni 14, 2022 chawhnu dar 2:40 khan a thleng a. Lung lakna quarry, ABCI Infrastructure Pvt. Ltd. ta a ni. Report thehluh a nih thleng hian duty roster atanga a lan danin quarry chimin a chhilh zat hi mi 12 an ni a, leiminin a chhilh mi 4 te hi ABCI company hnuaia thawk an ni a, mi 8 hi ABCI sub-contractor hnuaia inhlawh an ni thung.
He chhiatna rapthlak tak thleng hi Mizoram sorkar chuan pawi a ti tak meuh a. Ruang zawn hna hi thawh mek a ni a, hmuh kim an nih hma chu kalpui tur a ni. Ruang zawn hna thawktu mi tlawmngaite hman turin DM&R Minister Lalchamliana chuan cheng 20,000 a pe a ni.
