Vawiin Ni 13.07.2023(Ningani) hian PC Party chuan an President Pu Vanlalruata ho in Luangmual a Govt. Complex, Sawrkar in ‘Ainawn Veng’ ti a a hming thlâk a tum mêk hmun-a sawrkar Quarter, sawrkar-in ṭhiah a tum te a hmun ah tlawh in an enchiang a. Quarter ṭhiah tum tam ber hi ṭhiah ngailo, kum eng emaw zât la luah tlak ani tih an finfiah tih an sawi.
Hemi chungchang ah hian Vanlalruata chuan, “June 22, 2023-a Sawrkar in Quarter luahtu te chhuak tura a tih na hi, Quarter Building te a hmuna kan enfiah vek hnu ah thil ṭullo tawp a nih avangin Order hi sût lehnghal turin Sawrkar hi kan ngen a ni,” a ti.
Quarter Building ṭhiah tura tih 47(sawmli leh pasarih) zîngah hian ṭhiah ngai pahnih khat bak a awmlo a; Heng Quarter ah hian chhungkaw 180(Za leh sawmriat) vel an cheng mêk a, Quarter luah man ah hian kum tin Sawrkar ah cheng Nuai 100 vel bawr a lut ziah a. Quarter ṭhiah tum te hi sak ṭhat tumna a awm miah lo a; “He Sawrkar hmalak tumna hi chhungkaw 180 chuang ṭul miahlo a tih buaina leh Sawrkar-a kum khat a sum lût cheng Nuai 100 vel bawr tawpna tur niin hmalakna awmze neilo leh hek sak thlawn a ni,” Vanlalruata chuan a ti bawk.
Hetianga awmze neilo a Sawrkar hmalakna hi PC Party chuan an dem takzet a, Quarter te venghim tur leh awmze neia hma la turin Sawrkar an ngen a ni.
Vawiina Quarters tlawhnaah hian President hi Sr. Vice President Lalrinzuala Chawngthu, General Secretary H Lalremsiama, Secretary Lalthuamliana leh Thalai President Alfred Zoremsanga Colney ten an ṭawiawm a ni.
