Nimin Nilaini, 18-09-2024 khan BJP MP Anil Bonde-a’n Congress leader Rahul Gandhi lei (tongue) rawh sak ngei ngei tur tia a sawi avangin FIR thehluh a ni.
Bonde hian police officer pakhat hnenah Rahul Gandhi chungah FIR thehluh a ṭul zawk thu sawi ve thungin, USA-a Rahul Gandhi a zin ṭuma reservation chungchang a sawi chu thil hlauhawm takah a ngai a, bahujan (brahmin ni lo) mite a ti thinur hle tiin a sawi a. Lok Sabha Leader of Opposition Rahul Gandhi lakah FIR thehluh ngei ngei a ngaih chhan chu India ram mipui 70% lai reservation lak bo sak tumna hi a thimrim thlak hle-ah a ngai a. Rahul Gandhi-a’n foreign a kal ṭuma a thusawi hi thu buaia lak a, case thehlut turin BJP party mi, ST leh SC te police station-ah kalin demand an siam ngei ngei tur a ni tiin Bonde hian a sawi bawk.
Bonde laka FIR thehlut tur hian Congress hotute Amravati City Police Commissioner hnenah an kal a, action la turin an ngen a. Rajapeth police station-ah FIR hi thehlutin Bharatiya Nyaya Sanhita section 129, 351 (ii) and 356 dan an tlawhchhan a ni.
Thawhlehni khan Shiv Sena MLA Sanjay Gaikwad pawhin Rahul Gandhi lei tan sak thei hnenah cheng nuaih 11 pek a lo tiam tawh a. Bonde hian lei intan sak tum tawngkam hi thil mawi lo tak ni mahse, Rahul ji-an reservation a sawi hi thil hlauhawm tak a ni si tiin a lo sawi tawh bawk.
BJP MP hian tupawh foreign rama thu awm lo pui pui sawi chu a lei tan sak aiin meia rawh a tha zawk. Rahul Gandhi emaw, Dnyanesh (Editor) emaw, Shyam Manav (Social activist) pawh ni se, bahujans (Brahmin ni lo) rilru an tih nat phawt chuan an lei meia rawh sak ngei hi tih makmawh a ni tiin a sawi bawk.
Rahul Gandhi hian September 2024 thla tira USA a tlawh University zirlaite hnenah reservation system chungchang a sawi a, ramhruaitu ten hnam hnuaihnung zawk mi maktaduai tam tak te an enkawl dan chu sawiselin, “India rama sumdawng hruaitu list en ula, Tribal hming te, Dalit hming te, OBC hming te zawng teh u. An ni ho hi India mihring zaa sawmnga zet an ni a, India mi hausa 200 thlan chhuah zingah OBC pakhat chauh i hmu ang.” tiin a sawi a. Hei hi BJP leh a thurualpui ten hnamhnuaihnung hmusit tiin an beilet zui a ni.
