Vawiin khan Raj Bhavan a Larsap chenna building kawtah lehkha khawng bawm chhia lakkhawm hmanga thutthleng, Tetra Pak in a siam khuhhawnna neih a ni a. He hun hi Larsap Hari Babu Kambhampati chuan a hmanpui a. He hunah hian lehkha chhia hman tangkai chungchanga pawimawh a tih zawng te sawina hun a hmang nghal bawk a ni.
Larsap chuan Lehkha khawng bawm chhia lakkhawm hmanga Thutthleng tangkai taka siam a ni chu bawlhlawh sawngbawlna kawngah hmasawnna a nih bakah, environment chhe zel tur venna atana hmalakna pawimawh tak a ni a ti. India ram chu SDG thil tihlawhtling turin tan a la mek zel a; COP 27 a LIFE Campaign thil tum pawh tih hlawhtlin a tum tih a sawi a. India ram chuan bawlhlawh siam tlem leh bawlhlawh sawngbawlna uar zela Green Economy nih a tum a ti.
India ram chuan President chair changing G-20 a hruai dawn a; G-20 ram te hian Climate chungchang an ngaipawimawh tur a ni bawk nen India ram chuan sik leh sa leh kan chhehvel tuamtu boruak chhe mek zel siam that kawngah hian nasa zawka tanlak a tum chho mek a ti a. Khua leh tui zawng zawng te, a bikin thalai te chu kan nitin khawsaknaah kan chenna leilung ti chhe thei thil te uar lo telh telh turin kan insawm a ni a ti.
Himanshu Priyadarshi – Head of Public Affairs and Government Relations- South Asia Tetra Pak in report a pek dan chuan, heng thuthleng te hi lehkha khawng, bawnghnute, theitui leh thildangte funna chhia paih tawh, lakkhawm atanga siam a ni a. Heng thutthleng te hi a nghet tha viau a, enge maw chen ruah a do thei a, tlumpi leh rannung te lakah a him tawk niin a sawi. Tetra Pak in Raj Bhavan-ah program an rawn hman chhan chu hetiang thiamna hi Mizoramin a hman tangkai an beisei thu leh bawlhlawh recycled theih te chu bawlhlawh paihna hmunah paih a nih mai loa tangkai taka hman theih a nih dan te mipui zirtir a ni a ti.
