Vawiin August ni 29, 2023 Thawhlehni hian Saikuti Hall Lunglei ah Sports & Youth Services Department leh Mizo Zirlai Pawl buatsaih “Youth 20 Mizoram, Meet on Nationalism, Patriotism & Development” hun hman a ni a. Rajya Sabha MP K.Vanlalvena chu Khuallian a ni.
Khuallian K.Vanlalvena chuan kalkhawm zirlaite hmaa thusawina hun tha a neih avangin lawmthu a sawi a. Zirlaite chu future tha takin a hmuak a, beidawng lo turin a chah a. MP chuan, Zirlaite chu rilru leh thinlung put dan dik nei tura ngenin, ‘Lehkha kan zir ve lai atanga khuallianin min hrilh fo chu, “Zirlaite hi ram nghahfak in ni a, ram leh hnam hruaitu in la ni dawn” an ti thin. A hun lai chuan ‘min tih-lawm an tum mai mai a ni’ tih a awl viau. Mahse, hei hi thudik a lo nihzia a chiang a, zirlaite hi nakina ram hruaitu tur, ram nghahfak in ni tih ka sawi duh a ni’ a ti.
K.Vanlalvena chuan, “Lehkha zir a sawt tawh lo. Hna a vang tawh lutuk… tia sawi an awm chuan dawt an sawi a ni tih pawm ang che u. In hmabak hi a eng a ni, thangtharte tan hmakhaw eng lo nia sawitu thusawi chu awih reng reng suh u. Tuna sorkar hnathawk te, ram hruaitu zawng zawng hi an chawlh a la hun dawn, an hmun ruak in luahkhah a la ngai ang. Chutiang tur chuan inbuatsaih ula, beidawng suh u.
“Thiamna a sang zela, mobile phone hmangin in zirna pui thei, in duh zawng zawng in hmu thei tawh a, zirna hi a awlsam tawh a ni tih hria ula, in hmakhua hi pianhmang that leh that lohah te, in hausak leh sak lohah te a innghat lo a ni tih in hriat a ngai. A pawimawh ber chu rilru putzia dik neih a ni. Kan thinlungah hian hneh theih loh thiltih theihna rûk a awm a, chu chu hman thiam kan zir a ngai a ni,” a ti.
K.Vanlalvena chuan, “Rajya Sabha ah Chairman phalna in vawi 14 thu ka sawi tawh a, a phal lo chung chung vawi 2 ka sawi tawh bawk. Hei hi chapopui vanga sawilang ka ni lo a. kan thinlungah theihna leh tumna a awm tlat chuan kan ti thei mai a ni,” a ti.
MP chuan, “Pu Modi-a hi Indian Nationalist nge Hindu Nationalist a nih ka ngaihtuah fo mai. A thusawi tam takah India tih aiah Hindustan tih a hmang thin a. Kei chuan ‘Hindustan rama min siam in tum chuan kan tel ve thei dawn lo’ tiin ka lo react ve thin a ni. Mizo Nationalism kan tih chuan Mizote hi tu thuhnuaiah mah awm lova, mahnia ro in rela, mahni kea din duh tlatna thinlung hi Mizo Nationalism hrilhfiahnaah ka ngai tlat a. Hei hi ka thinlunga riak reng a ni a, a reh maiin ka ring lo. Engtik niah emaw chuan ram khat niin kan la awmkhawm anga, eng hmingpuin nge kan la dinchhuah dawn tih erawh chunglam thu thu a ni. Kan insuihkhawma, rorelna pakhat hnuaiah mahnia ro inrela kan awm hi ka beisei tlat a ni,” a ti bawk.
Lalnunmawia Pautu, President MZP General Headquarters chuan keynote Address a sawi a, Lalhruaitluanga Chawngte, Adviser, MZP Gen.Hqrs. hnen atangin ram hmangaihna awmzia leh hmasawnna neih dan ngaihthlak a ni bawk.
