Vawiin ni 25th April, 2022 (Thawhṭanni) chawhnu dar 1:30 khan MZP General Headquarters hruaitute chuan School Education Minister Pu Lalchhandama chu a office-ah an hmu a. Myanmar ram buaina avânga Mizorama hima zawnga lo tlan kan unau, zirlaiten an zirna an chhunzawm theih dan tur an sawipui.
MZP chuan, “Kan unau Mizoram a himna zawnga lo tlan zirlaiten an zirna an chhunzawm theih nan ruahmanna ṭha zawk siam turin Education Minister a ngenna chu, Minister chuan ṭha a tih thu leh hmalakna chak taka kalpui mek a nih thu a sawi a. Zirna Document/ Education Certificate felfai tak neite tan chuan admission leh zirna chhunzawm kawngah harsatna engmah a awm loh tur thu Minister chuan a sawi,” an ti a.
Vawiin vek khan Mizoram Board of School Education (MBSE) hotute chu an office-ah an hmu bawk a. HSLC leh HSSLC exam neih zawh takah result dik leh felfai zawk a awm theih nan theihtawp chhuah turin an ngen a. MBSE hotute chuan result dik leh felfai nei tura theihtawp an chhuah thu an sawi a, kum danga harsatna awm thinte pawh a theih ang anga pumpelh a nih theih nan endik kawngah pawh kumdang aia uluk zawka hma an lak thu an sawi.
MBSE chuan kum dang zawng aia uluk lehzuala hma an la niin MZP chuan a hria a, beiseina sang tak nen a thlir mek a. MBSE hmalakna leh hmachhawp hrang hrangte pawh sawiho a ni.
