Ram 36 atanga lemziakmite telna ‘Love Revolution – An International Art Exhibition’ chu vawiin (Ni 21.9.2022) atangin Millenium Centre Atrium ah neih tan a ni.
Exhibition hawnna Millenium Centre Rooftop-a neihah exhibition hawngtu Dr. Lal Thanhawla chuan international art exhibition meuh Mizoramah buatsaih chu thil harsa tura ngaih a nih laiin, Lalhming Mawii (Amoii) ram pawn lam mi engemawzat a sawmkhawm chu lawmawm a tih thu a sawi.
Mizoramah chuan lemziak lam hi mi tam tak ngaihven hlawh pha lo a nih laiin, thil pawimawh tak a nih avangin amah ngei pawhin theih tawpin tha a lo thawh ve tawh thin tih Mizoram chief minister hlui hian a sawi. “Art hi Mizote chemkalna zawng tak a ni a, kan in promote tawn a tul. Artist-te phur nan leh tha zawka an thawh theih nan kan tih phur a ngai. Kan artist te zingah internarional standard nei mi engemawzat an awm tih kan chiang a, hnamdang aiin kan duai bik lo a ni tih lantir kan duh avangin kan sawrkar lai pawh khan Kolkata leh Delhi ah te exhibition kan buatsaih sak a, sawrkar ang pawhin sawrkar hmun leh pisaa dah tur an lemziakte kan leisak a ni,” a ti.
Induhsaka in chawimawi tawn a tul, tiin, sawrkar pawhin hlutsak se a duh hle Dr Lal Thanhawla hian a sawi a. “Mimal emaw sawrkar puihna in emaw khawpui pawimawh deuhah kan inphochhuah a tul hle a, a rah sengtu tur chu keimahni, Mizote tho kan ni,” a ti.
International Art Exhibition-ah hian a thupuiah ‘Love Revolution’ tih hman a ni a. A hawnnaah hian khualzahawmah Padma Shri B Sangkhumi leh Vestige Millionaires Council member Meriam L Hrangchal ten an telpui a. Lemziak lama Mizote zinga sulsutu – Lalbiaklara, Rohnuna, Buta, Tlangrokhuma, Most Rev Stephen Rotluanga leh midangte chawimawina hlan an ni.
