Aizawl 6th May, 2024: PC Party chuan MLA te inhaivurna uchuak leh Speaker car thar chungchang ZPM Val Upa Council hnenah vawiin hian ziakin an thlen tih an sawi.
Ram hruaitute khawsak dan PC Party chuan tha an tih loh dan sawiin, “Fate chawhmeh ren zirtir chunga chawm bawka hawp bawk ang an ni,” tiin Vanlalruata, PC President chuan, “Inrenchem an sawi reng laiin uchuak takin an invulh a. Simple interest-a kum khata 5.5% leka pung turin MLA 40 in public money atangin kuminah cheng nuai 1,050 puk an tum a. Hetiang em em hian MLA term kal tawha MLA te an la invulh ngai lo a. Mipui min zah loh dan hi a uchuak a ni,” a ti a.
Motor lei loh uar taka an sawi laia Speaker tan motor changkang uchuak lei a nih chungchang sawiin, “Hetianga speaker hman tur leina tur hian nikum leh kumina budget-ah pawisa ruahman a awm lo a. Motor an lei dawn anih pawhin hetianga changkang leh manto uchuak hi mamawhna a awm lo,” a ti bawk.
Heng thil te ZPM VUC hnena thlen anih chungchang hi vawiina PC Party Office Bearers Meeting-ah Pu Ruata chuan a sawi a. ZPM campaign auhla sawi chhuakin, “Kan kal sual dawn aniha ‘het’ lo ti tur Val Upa Council kan nei, an ti thin a. An kalsualna chu an VUC-ah chuan kan thlen ta a. Enge an tih kan en ang,” tiin Pu Ruata chuan, “Hemi chungchang hi kan umzui zel dawn a. Kan phawrh thui tial tial ang,” tiin hemi chungchanga puanchhuah hmabak a la awm thu a sawi bawk a ni.
