September 26,2022 (Thawhtanni) hian Golden Hall, Congress Bhavan-ah ‘Siamthar Lehna Crusade’ thawh thumna hun hman a ni a, Speaker Rev. Vanlalzuata Speaker hnen atangin ‘…A Ram leh a felna zawng hmasa rawh u……’ tih thupui hmangin Pathian thuchah ngaihthlak a ni.
Rev. Vanlalzuata chuan, Congress Party in Devotion an ngaih pawimawh dan chu ralkhat a ngaih aiin a hmunah lawmawm a tih thu sawiin, Pathian thua tih tak takna chuan Crusade rah tha a chhuah ngei a beisei thu thu a sawi.
Lal Isuan kan ei pawhin kan in pawhin kan thiltih apiang Pathian ropuina tura ti tur leh chumi tur chuan a ram leh a felna zawn hmasak a pawimawh a ti. Pathian dah hmasak ber chu thiltih makmawh a ni, a ti a, Pathian dah hmasa lova a thilpek thlakhlelh hmasak chu a pawi thin, a ti.
Fiji ram chungchang sawiin, ruihhlo hmunpui, eiruk hluarna, an lalpa pawh corruption lalpa tih hial a ni. Mahse Pathian hnenah tawngtaiin Pathian mi President-ah an thlang a, ramin malsawmna chi hrang hrang a hmaa an neih ngai loh thlengin Pathianin a pe a, an ram a dam a, Pathian fakin an Hallelui leh thei ta, tih a sawi. Pu Zuata chuan, Party hrang hrangten kan ram dinhmun dik tak ngaihtuah a hun. Congress Party chauh ni lo, Party hrang hrangten Lalpa rawn lova kan ta emaw ti a mahni nawmchenna leh induhsak tawnna ringawt mai ngaihtuah kan nih chuan Pathian kut kan la tuar dawn. Chu chu hlauhawm lutuk, fimkhur angai takzet tawh tih sawiin, Nehemia hunlaiin mipui an mangang a, an lalte lah chuan mipui chungah leh an ran te chungah thuneih an tum, tih sawiin, ram mipui te chuan Pathianin ram a pekah ngei bawih ang maiin an in ngai a, an rum tlawk tlawk mai a ni. Kan ram Politics a kal sual vaih chuan Mizo leh Mizo hi Bawihah kan inchhawr mai ang.A hlauhawm lutuk. Politiciante hian Pathian i tih ang u.
Abraham Lincoln-a’n Politics a khelh chhan chu America mipui zawng zawng zalen taka an awm theihna tura Sal chhuah zalen a ni. America mipui zat ve zalen a, a zat ve zalen loh kha kha Pathian duh dan a nih a ring lo. President a nih pawhin a hlim viau lo, a chhan chu President hna chu hlimhlawp leh inchhek arbawm lam a nih loh avangin han hlim viauna tur niin a ngai lo, a ti a, Pathian kan lamah a tang em tih aiin Pathian lamah kan tang em?’ tih a pawimawh zawk, a ti.
Mahatma Gandhi kha kum 7 Politics a khel a, kum 1947, August thlaa India in zalenna a neih pawhin President a ni loa, Prime Minister pawh a ni loa, Cabinet Minister pawh a ni lo, Mahatma Gandhi a ni tawp. Politics a khelh chhan chu India ram mipui mittui zawng zawng hruk hul a ni a. India mipuite pawh Pangpar huana pangpar mawi takah chan tir a tum a, amah tantute leh beitute, mi hniam leh mi sang te, eng hnam mah a thliarhrang lo. Lal Isua duhzawngin Poltics a khel a, ramin malsawmna a dawn phah a ni, a ti a, Ram rorelna tha leh dik nei turin Pathian dah hmasak a pawimawh tih sawiin, ram hruaituten an rilruah a ram leh a felna an dah hmasak hunah hunah Pathian malsawmna kan dawng ang, a ti bawk.
Vawiin siamthar lehna Crusade hi MPCC PAC Secretary Pu PB Lalsawmliana’n a kaihruai a. Tv. Sawmtea Chhangte, Tv. Zorema Ralte leh Sangkimi Khiangte ten Pathian fakna hla an sa bawk. Congress Party hian Pathian Biak inkhawm leh tawngtai rualna hun hi kartir thawhtanni apiangin a hmang thin a ni.
