Vawiin ni 27th August, 2022 (Inrinni) hian Aizawl West III Congress Special Block Conference, MPSOA Conference Hall, CID Complex, Bungkawn, Aizawl-ah hman a ni a, MPCC President Pu Lalsawta’n a hmanpui.
Pu Lalsawta chuan Bible chang Sam 115:16 thu, “..Vân khi Lalpa vân a ni a, Lei hi mihringte tân a pêk a ni…” Tih thu chu vawi 3 chhiar chhuakin, “Pathianin ram tha tak leh mipui tha min pe a, ram roreltute’n Pathian duh dan anga ram enkawl hi kan mawhphurhna a ni. Roreltu tha neih loh vangin ram lei lung in ang reng North Korea leh South Korea dinhmun chu a in danglam hleih hle. Khawvel hriat khawpa dinhmun thaa lo ding ta Singapore pawh roreltute tha leh huaisen an neih vang a ni. Israel pawhin chu dinhmun chu an luah a ni. Pathianin hna thawk a, mahni mamawh thawk chhuak turin min ti a. Hnathawk lo a awmhmuna a awmsa ringte taksa leh rilru a hrisel thei lo. Taimak leh rinawmna hi kan dinchhuahna tur a ni,” a ti.
Pu Lalsawta chuan, “Loneitu, kuthnathawktute leh thalai tam tak tan eizawnna ngelnghet siam sak kan tum a, chutiang tur chuan kan tih thin dan thlaka tih danglam (Change) a ngai. Thar chhuah tam a ngai a, thar chhuah te hralhchhuah chakawm tak tura a that a ngai bawk. Thar chhuah tamin a tlawm a, a ei pha kan tam a, a siam danglam leh thawnchhuah pawh nasa takin a awlsam phah a ni,” a ti.
“Sorkar hi Mamawh intawm – Feh kawng, Electric, tui supply, Cold storage, Processing Unit, Value Addition, Market, etc siamtu tur, Central Ministries (MSME & ITI training) thlenga sum leh awlsamna, ‘ease of doing Business’ hmanga a puitu (Facilitators) tur a ni a, hnathawktute mamawhna zawn zelah ‘Tang puihna’ pek an ni ang a, tang thei lo te pawh tang thei turin kan pui ang a, tan nachang hre lo te pawh anmahni zirtir chungin, an dinchhuahpui ve theih nan kan pui dawn a ni,” a ti bawk.
Pu Lalsawta chuan dan rorelna (Rule of Law) ngaih pawimawh a ngaih thu sawiin, “Mizoram mipuite chu Court rorelna hnuaia thutluknaah an ngaih a tha ta chiah lo niin a lang. Thil dik lo ti theuh theuh, MLA tih sual leh veng kil tawpah hmeithai fa tih sual thutlukna chu a danglam mek a ni. Kan ram hi misual tlemte tangrualin mi tha, tangrual ve lote an hnehna ram a ni tur a ni lo. Sorkar thaah mipuiin misual ep tura tanrual a ngai ngai lo,” a ti.
Thuneihna in sem zai a tul thu sawiin, “Thuneihna hi kan hnuaia mite pe ngam ila, mi hi kan rin tlat chuan an rintlak mai thin. Midang chunga rinna nghat ngam lo mihring chu amah a rinawm lo tihna a ni. Ram leh hnam dah hmasa lova Politics khel, Politician hausa nih tum ten bansan rawh u. Kan ram siam turin mipuiin min nghak thup, a sawi ni lo, a tiha tih, a dika dik a hun tawh. A thlaka kan inthlak hlawk a ngai. Thluaka sum lut ang chi chu kan zingah an tel ve thei lo ang. Tel tur pawhin kan duh lo. Department leh a chhung atanga sum lakna tur hmun hre riau kan mamawh lo. Mi tha leh dik, Naupang te te, upa leh tar thlengin mi dik, mi tha, rintlak leh rin ngam, a tawngtai thingthita van tawng, ram tana in pe famkim kan duh tawk. A bak a ngai lo,” a ti.
Aizawl West III Block Special Conference hian Resolution pathum an pass a, chungte chu :
1. Mizoramin thim chhah tak Tah leh Rumna kum 20 chuang a tawh lai mekin Pu Lal Thanhawla rawn langin, Remna leh Muanna a rawn thlen a, tunah a kumte tamin lo uaithla deuh tawh mah se, Mizoram nu leh pa nih tling Zoram tana Sulhnu duhawm tak tak min hnutchhiahtu Dr. Lal Thanhawla hi Aizawl West-III Congress Party Worker-te chuan kan theihnghilh thei dawn tawh lo a ni.
2. Tuna kan Sawrkar hrawn mek MNF Party sawrkar pachhe tak hi Zoram mipuiin kan ning tawh takzet a, leiba tam tak min hnutchhiah thintu MNF sawrkar hi tawp vat vat se kan ti.
3. Pu Lalsawta Congress Party President thar hi Aizawl West-III Congess Party worker-te chuan kan ring tawk a, eirukna lak a fihlim, mi dik, sum leh pai enkawlna lama mi bik leh entawn tlak Hruaitu chungah hian Zoram mipuite hian beiseina sang tak neiin Rinna an nghat lian hle a ni tih kan hria a, Sawrkar Kalphung dik leh tha min thlentu atan kan ring tawk a ni.
He hunah hian Pu TT Zothansanga Ex-MLA, Pi Zodingpuii, Ward-XV Councillor te pawhin thu an sawi a. Pu E. Laldinpuia, Block President in inkhawm hi a kaihruai a, Upa MC Hlunthanga, Joint Secy in hunserh hmangin Pu Vanlalnghaka Tlau Block Secretary in report a pek bakah nula R. Lianzampuii’n kal khawm te zaia awi a ni. Aizawl West III-ah hian block pakhat awmin Unit 13 a awm a ni.
