Chief Minister Lalduhoma chuan vawiin khan a office-ah Mizorama lo zin mek Surinder Bhagat, IFS, Jt. Secretary, Ministry of External Affairs, Protector General of Emigrants chu a kawm a. Thil pawimawh tak tak a sawipui.
Placement Agency lem, ram pawna dan lova hnathawk tura thawn chhuak thin te chungchang leh chung agency te license tihtawp a nih tak dan te, an prosecution sanction pawh Protector General of Emigrants lama dil mek a nih thu te a sawipui a. China rama Mizo nula pakhat leh tlangval pakhat, MBBS zir tura kal, harsatna han tawk ta te chungchang leh Myanmar atanga raltlan lolutte biometric-a chhinchhiahna tur kalpui tan a nih dan te bakah Taiwan rama India sawrkarin thalai hnathawk tur thawn a tum chungchang te pawh an sawi dun a ni.
Myanmar raltlante chungchangah hian Chief Minister chuan, tha taka rawn tlan, thuawih taka awm an awm a. An ram buai chhuanlama ramri kana tei kual thin, kan ram dan rawn bawhchhiat ching an awm bawk. Heng dan bawhchhiat chingte lakah hian khauh takin hma kan la dawn a, ramri rawn kan te Myanmar sawrkar ID hi an cham chhung chu laksak/kawlsak (deposit) zel mai zel thain kan hria, a ti.
Surinder Bhagat hian, placement agency lem ten India mi ram pawnah an thawn chhuaka, chung mite hmang chuan India mite rawn bum (scam) an tum leh a, a buaithlak thin hle. Ram pawna hnathawh tum kan thalaite an fimkhur a ngai hle a ti a. Taiwan rama hnathawk tur lakna hi sawrkar laipuiin a kalpui thuai a rin thu a sawi bawk.
Chief Minister nena an inkawm zawh hian Ministry of External Affairs leh Mizoram sawrkar indawrna thil pawimawh dangte sawiin, Vanlaldina Fanai, Commissioner & Secretary to Chief Minister leh Mizo Diaspora Cell hotute nena inkawmna an nei zui leh a ni.
Chief Minister hi TBC Lalvenchhunga, Adviser to CM, Vanlaldina Fanai, Commissioner & Secretary, Mizo Diaspora Cell Chairman ni bawk leh CM Office-a official pawimawh ten an tawiawm a ni.
