Ram pumah Fire Service Week hmang

Aizawl April 14 : Kum tinin Fire Service Week hi India ram pumah 14^th – 20^th April chhungin hman thin a ni a. 14^th April bik hi Fire Service Day/ Martyrs Day atan hman a ni bawk a. Kum 1944, April ni 14 khan Indo lawng lian tak  ‘S.S Fort Stikine’ an tih chu Mumbai lawng chawlh hmun a lo thleng a. He lawng, ralthuam leh bomb lam chi tam tak  phur hi a kang ta vak mai a. He kangmei chhuak rapthlak takah hian Bombay Fire Brigade mi 66 leh Bombay Salvage Corps mi 11 kangthelh tute chuan an nunna an chan phah a. Heng mitthi te hriatrengna atan hian Fire Service Day hi April 14 ah hian hman a ni ta a. April 14^th – 20^th chhung hi Fire Service Week atan hman a ni  thin a. He week chhung hian India rama Fire Service chi hrang hrang te chuan kangmei laka himna tur zirtirna an nei thin a ni.

Kumin 2022 Fire Service Week thupui atan hian India Sawrkar chuan “Learn Fire Safety, Increase productivity”  tih a rawn thlang a. “I neih sa a lo pun leh zual theih nan kangmei laka fimkhur zir ang che”  tiin a dah theih awm e.

Kumin hian Mizoram sawrkar ruahmanna angin Department/Office hrang hrangah  he   Fire Service Week pual hian thuchah ni 18.4.2022 dar 11:00 AM ah chhiar chhuah a ni dawn a. All India Radio, Aizawl leh Doordarshan Kendra, Aizawl atangin he Week pual hian thuchah leh Discussion te tih chhuah a ni bawk. Tin, sawrkar hmun pawimawh thlan bikahte Fire Safety Audit neih a ni a. School hrang hrangah Fire & Evacuation Drill cum Lecture & Demonstration neih pui mek a  ni. High School zirlaite tan Essay ziaka inelna buatsaih a ni bawk ang. Fire Service Week, 2022 denchhen hian Director General(Fire), Ministry of Home Affairs, Govt of India chuan an hnathawh that avanga chawimawina, Commendation Disc & Certificate dawng turin Mizoram Fire & Emergency Services mi panga(5) – 1. STO Lalremtluanga Varte  2. STO Lalremmawia 3. Fm Lalbiakhnuna 4. Fm Laldanzira, 5. Fm Jonathan C. Lalruatfela(Posthumous) te a rawn thlang bawk a ni.

Martyrs Day/Comemmoration Day Parade hi Aizawl ah chuan Fire & Emergency Services Headquarters, Hunthar Vengah ni 14^th April 2022 zing dar 7:00 a.m. khan  hman a ni a. Aizawl pawn lama Fire Station te chuan ni 14^th April 2022 zing dar  9:00 a.m ah an mahni hmun theuh ah an hmang ve thung a ni. He Martarte sunna hunah hian kum 2021 chhunga kangthelhnaa leh duty kaihhnawih a thi te hming chhiar chhuakin anmahni sun nan Minute khat ngawi renga dingin an pual hian Martar thlanah Pangpar dah a ni.