Vawiin khan ZPM chuan chhung inkhawm hun hmangin, he hun hi Dr.B.Lalramzauva, PAC Member chuan a kaihruai a. K. Sapdanga, Working President – in thu sawiin, “Tun hnaiah rawngbawltu ten kan pawl hi thu tha tak tak min hrilh thin a, kan rawngbawltute hian vei em em an nei a, chu chu, ‘ram rorelnaah hian Pathian ram hi lo thleng mawlh rawh se’ tih a ni. Kan rawngbawltute hian thil pahnih sawi ngei ngei an nei a. Pakhatnaah chuan, ‘Kalphung thar in tih hi sawrkar hnua hmang lovin campaign nan hmang rawh u’ tiin min fuih thin a, Pahnihnaah chuan, ‘Nangni pawl hi miputen tlanchhiat nan hman an duh a, amaherawhchu in inpumkhatna hi kan hlauthawng a ni’ an ti a. Kan inpumkhatna ti chhe thei reng reng eng thil mah ti lo turin min chah mawlh mawlh a, ZPM party pawh mipuite rin ngam a awm turin kan in chah a ni,”a ti.
ZPM Working President chuan, “Kum 1966-ah India lakah zalenna MNF-in a sual a, tunah erawh chuan Mizoram mipuite’n MNF laka zalenna kan sual mek a ni. Kum 1966-ah khan keini tlema a rual u deuhte chuan a takin kan hria a, vaivuak kan tuar a, keimahni hnam sipaite vuak kan tuar bawk a, kha kha a chhan chu india sawkar lakah hian Mzio hnam hi kan him lova kan hriat vang a ni. Zalenna sualtute kha kan zah a, kan tan em em a, mipute pawhin nasa takin kan tuar a ni. Tuna ro an rel tak hnu hian chanchin thar ngaihnawm pawl ber ni ta chu, sawrkar hnathawkin a hun takah hlawh an la mai thei tih te, sum pe chhuak thei lo mahse treasury khar a ni lo, tih te, kum thar atang chuan contract hna hi dik takin pek a ni tawh ang tih te, NABARD atangin cheng vaibelchhe 200 puk a ni dawn tih te a ni a, a lungchhiatthlak zawk a ni. Sum pûk hmanna zawh chhuah awih loh te hi kan ram dinhmun a lo ni ta a, thluaka sum lut te, lei ba tam tual tual sawrkar kan hrawn tak avangin he sawrkar lak atang hian zalenna sual lo thei lovin kan in hre ta a; law and order sawi tur a awm lova, hotupa ber mumang kan um vut vut a ni mai a ni. Kum 1966-a Mizo ten India sawrkar lakah kan ral mai dawna kan ngai ang khan tuna kan sawrkar lakah hian Mizote hi kan ral mai dawnin kan inhre ta a, kan dinhmun dik tak hi sawi zahthlak khawp a ni. He hnam hian a chunga roreltute lakah hian zalenna a sual a ngai ta a ni,”a ti.
ZPM Working President chuan, “Mizo miputen zalenna kan sualna hmanrua atan chuan silai te kan hmang ve lovang a, zalenna sualna tangkai ber EVM kan hmang dawn a ni. Chumi hunah chuan kan zalenna hi keimahni in pek tur a ni. Kan maganna lak ata hi kalphung thar mipui sawrkar, Chief Minister atana mipuiin kan awh rawn luai luai hmang hian mipui te in chhanchhuak ang u. Mipuiin dan anga rorel tur kan duh a, rin ngam kan zawng a, tun ang tluka kan ramin retheihna kan hmachhawn hi a la awm lo a, kan rama roreltute hi Kristian an ni a, ro an rel sakte pawh Kristian tho an ni, ram rorelnaah hian Pathian ram lo thleng se la, ram rorelnaah hian ram dan zawm ni rawh se,” a ti bawk a ni.
