Mizo Students’ Union (MSU) Gen. Hqrs., Aizawl chuan vawiin khan Parva -3 khuaah Bangladesh raltlan ni eng emawzat ramhnuaia riltam leh dangchara awm tawh mi 15 te chu Mizoram-ah Laldinsanga, MSU Vice President hovin Parva -3 khawtlang mipuite leh Tuichawng Group YMA, Damdep-2 khawtlang hruaitute nen an lo dawng sawng.
Raltlan lolut thar te hi ramhnuaiah ni eng emaw zat chaw nghei an nih avangin an taksa a chau hle a, an hriselna dinhmun enfiah nghal a ni. An ruala lokal mi 90 bawr vel erawh BSF duty ten kutthlakin, an ei leh in neih chhun te an tih chingpensak a, riltam a thih tawp ai chuan tiin Bangladesh lama ei tur an hmuhna tur ngaihtuahin Bangladesh lam an pan leh ta a ni. An letna lamah pitar pakhat erawh kal kawngah a boral tih thu MSU chuan dawngin, “Kan unau himna zawnga lo luh tum te, BSF ten ramhnuaia boral tura an lo let tir leh hi na kan tiin BSF duty te kan dem takzet a, he thil thleng hi kan en liam mai mai dawn lo a ni,” an ti.
MSU chuan raltlan lo lut thar te hi Parva -3 khuaa sawrkar official awm te-ah an hriattir nghal a, sawrkar kut atanga an him chhunzawm zel pawh an beisei a. Tunah hian Bangladesh ram buai avanga Zohnahthlak unaute ram hnuaia chaw nghei leh thlabar taka awm mek hi mi 800 chuang an la awm thu hriat a ni a, himna zawnga Zofate In Pui pana Zohnahthlak lo raltlan mekte hi Mizoram an luh ngei theihna kawnga harsatna awm zawng zawng sukiang thuai turin MSU chuan Mizoram sawrkar an ngen nawn leh a, tunah hian Parva -3 khuaa raltlan awm zat hi 310 an awm mek a ni. Mizoram Sawrkar chuan kan unau raltlan lo lut te himna leh riltama an awm loh nan theihtawp a chhuah mek zel avangin MSU chuan lawmawm a ti hle. Chin National Organisation (CNO) chuan Bangladesh unau raltlante tan tanpuina sum fai thahnem tak MSU kutah an hlan bawk a ni.
Laldinsanga, Vice President, MSU Gen. Headquarters chuan, “Bangladesh a kan unau Zohnahthlak awm mek te hi Bangladesh Army, Rapid Action ten an nun nek chepin an thil lei leh hralh phalsak an ni ve lova, an hmeichhia te an khawihin mipa te an man a, Bangladesh sipai laka himna beiseiin Zofate In Pui, Mizoram chu an himna turin an lo pan ta a ni”,a ti.
