Vawiin, Ni 13.10.2022 chawhma dar 11:00 khan Art & Culture Department leh Central YMA te tangkawp buatsaih, ‘Ramngaih Hla Zaipawl Intihsiak – 2022’ kharna inkhawm chu Aizawl Vanapa Hall-ah neih a ni.
He hunah hian R. Hmingthanzuala, Director Art & Culture Deptt. chu Chairman niin hun a kaihruai a. R. Lalzirliana, Hon’ble Minister Art & Culture Department etc. chuan Khuallian niin hun ahmanpui bawk. Prof. Lalnuntluanga, Gen. Secy, Central YMA leh Organising Secy. ni bawk chuan Zaipawl intihsiak chhunga thil chhinchhiah tlak eng eng emaw te sawiin report a pe bawk a ni.
He Zaipawl intihsiakah hian Aizawl Municipal Corporation (AMC) huamchhung atangin Branch YMA 34 an tel a. Ni 10.10.2022 khan Zaipawl 19 in lan in, a tuk Ni 11.10.2022 ah Zaipawl 15 ten intihsiak an rawn hma chhawn leh a ni. Heta tang hian Top 5 thlan chhuah niin Br. YMA Zaipawl 6 an in hlang kai a.
Zaipawl member tam ber chu Dawrpui niin 65 an ni a. Venghlui Br. Zaipawl te 61 niin an dawt a. Member tam lama 3na niin Armed Veng Br. YMA Zaipawl te 57 an ni.
Ramngaih hla panga (5) –
1. Ro min relsak ang che. (Rokunga)
2. Raltiang i kai ve ang. (Rokunga)
3. Khuavel i la chhing ngei ang. V. Thangzama)
4. Pipu chhuahtlang hlui. (Liandala)
5. Sangha vuak hla. (Rokunga) te atangin hla chuam 1 thlang in, a bâk hla Pali (4) te atangin pakhat pawt leh in an intihsiak a ni.
Ni 12.10.2022 zana Top 5 result puan chhuah a, a tling Branch YMA Zaipawl 6 ten vawiin hian an hla chuam leh an la pawh fuh loh hla dang 3 atanga an pawh fuh leh hla 1 hmangin an intihsiak leh a. Chuta tanga Judge 5-te thutlukna a final result chu hetiang hi a ni:-
🇾🇪🇾🇪🇾🇪
1na – Dawrpui Branch YMA Zaipawl
2na – Durtlang Branch YMA Zaipawl
3na – Ramthar North Branch YMA Zaipawl
4na – Bawngkawn Branch YMA Zaipawl
5na – Ramhlun South Branch YMA
6na – Bethlehem Vengthlang Branch YMA Zaipawl te an ni a.
Zaipawl Conductor thiam bera thlan chu H. Lalmalsawma, Durtlang Branch YMA Zaipawl conductor a ni.
Lawmman 1na hian ₹1,00,000/- (Nuaih khat) an dawng a. 2na in ₹70,000/- (Sing sarih) leh 3na in ₹50000/- (Sing nga) an dawng a. Top 5 a tling dang Zaipawl 3 ten ₹20, 000/- theuh an dawng bawk a ni. Tin, he Zaipawl Intihsiak a tel top 5 in hlang kai zo ta lo Branch YMA Zaipawl zawng zawng ten ₹10,000/- theuh an dawng bawk a ni.
