Aizawl August 9 : Vawiina Ramri chungchanga Mizoram leh Assam aiawh te inbiaknaah, ramri a buaina awmthin te chinfel tumna kawngah State pahnih aiawhten ramri bula District Administration aiawh te harsatna thlen emaw, buaina a awm kher loh pawh in thla 2 dan ah in biakna neih thin turin thu an ti tlu.
Vawiina Aijal club a state pahnihte inbiak na hi Mizoram lam atangin Home Minister Lalchamliana leh Information Minister Lalruatkima te telin, Assam lam atangin Border Minister Atul Bora leh Minister Ashok Singhal te an ni a, darkar hnih chuang an biak hnu ah ramri chungchanga ram 2 te chuan thuchhuah intawm joint Statement an siam a, he thuchhuah ah hian Mizoram aiawh in, Home Minister Lalchamliana leh Assam aiawh in Border Minister Atul Bora ten an hming an ziah hnan a ni.
Hemi hnu hian State pahnihte inbiakna leh an thuchhuah chungchang ah thuthar lakhawm tute kawmna neiin, State pahnih aiawh Minister te chuan ramri chungchanga remna leh muanna awmzel an duh tih tarlangin, ramri a kuthnathawka eizawng huan thlai siamte pawhin harsatna an tawh lohna tura hmalakte, ramri depa awm District thuneitu Deputy Commissioner te chu thla 2 danah harsatna leh buaina thleng awmlo mahse ramri a inremna leh in pawh tawn nan inbiak thin tura an tih thu an sawi a, October thla ah hian Thuneitu sang zawk High Level Meeting Guwhati ah neih tura ruahman anih thu an tarlang bawk a ni.
Thuthar lakhawm tute zawhna chhangin, nikum lama Ramri buaina thleng chungchanga State 2 ten FIR an thehluh chungchang chu chinfel theih mai a nilo a, Court rorelna Judiciary huang chhung a nih chuan tun dinhmun ah engtia tihtur nge tih sawi theih ala nih loh thu an sawi a, state 2 tena ramri a an ram hauhchin leh duhdan pawh vawi leh khata siamrem mai theih anih loh thu an sawi bawk a ni.
