India leh Bangladesh inrina hrul hmun hrang hrangah pawh, India ram zalen ni – Independence Day champha vawi 75-na chu uar leh ropui takin vawiin khan, ramri vengtu Border Security Force 131 battalion-ten an lawm.
BSF 131 battalion-te hian an commandant Pu KS Nautiyal ruahman angin, an Border Outpost 19-ah Independence Day lawmna hun an hmang a, ramri vengtu sipai bakah, an bulhnai khuaa khawthlang hruaitute leh mipuite nen, hlim taka hun hmangin, BSF-te hian naupangte hnena chithlum an sem bakah, mipui pungkhawmte hnenah India zalen ni champha lawm nan, ei leh in tur an sem bawk.
A lawmna pui ber, Tablabagh Border Outpost-a hun an hmannaah, an Commandant Pu KS Nautiyal chuan India hnam puanzar pawtpharhin, kalkhawmte chu Independence Day chibai a buk a, India ram a zalen theihna chhan chu ram tana mi inpeten an nunna an hlan vang a ni tih sawiin, ram chhung mipuite zalen leh him taka an awm zui theih nan, anni pawh nun thapin ramri-ah India ram leh mipuite veng turin an awm tih a sawi.
Pu KS Nautiyal chuan, ramri venhim hna an thawh piah lamah, mipuite ten inpumkhatna ṭha an neih a tula an hriat avangin, kawng hrangah ramri-a mipuite nen thawkhoa an innghen tlat thin thu a sawi a, zirlai kalkhawmte chu sipaia tan a thatna leh hlawkna hrang hrang hrilhfiahin, chumi dinhmun awlsam zawka an thlen theih nan, NCC luhchilh nachang hre turin a chah a ni.
