May ni 1 atanga Mizoram leh Myanmar inkar ramri khar tur tia thuthang chu a taka kenkawh a ni lova, ramri-ah intlawhpawh zui zel a ni.
Home department hotute chuan tun hnai khan Assam Rifles leh Subsidiary Intelligence Bureau (SIB) thuneitute kovin hemi chungchang hi an sawipui a. A tira Champhai district VC leh YMA hruaitute bakah Myanmar ramri depa awm khaw engemawzat khawtlang hruaitute hnena May ni 1-a ramri khar a nih tur thu an lo hrilh tawh chu a taka kaltlangpui turin Ministry of Home Affairs atangin thupek an hmu lo ni a hriat a ni a. Chutiang thupek chu phawrh tur an nei bawk lo niin Home department hotute chuan an sawi a.
Home department hotute chuan Mizoram chu India hmarchhak state zinga hel pawl nei lo leh muanawm ber a nih avangin sorkar leh district thuneitute hriatpui lohva mipui tiralkhel zawnga khawtlang hruaitute kokhawm tawh lo turin an hriattir bawk a ni.
Hetih lai hian Ministry of Home Affairs chuan ramri a inkalpawh phalna ‘Free Movement Regime’ an tih mai hi tihtawp (suspend) a nih tawh thu an puang niin chanchinbu thenkhat chuan an ziak a. Mahse, Mizoram leh Nagaland-ah chuan tun thlengin a taka kalpui a la ni lo a ni.
Hetihlai hian, tun hnai-ah khan Myanmar ram Chin state a Paletwa bial atangin raltlan 40 chuang chu Lawngtlai district-a Hruitezawl khua-ah an lo luh belh ni a thudawn a ni.
Intelligence lam atanga thu dawn danin Myanmar a Rakhine state leh Chin state a awm hel pawl lian ber Arakan Army chuan Paletwa khawpui (township) an sipai atan thalaite tihluihna a zawm turin an ti a. Tahan Post-in a ziah danin April ni 30, chawhnu khan AA-a tel duh lo hmeichhiate telin mi 40 chuang an rawn thleng a, a tuk May ni 1 khan hmeichhe 7 an thlen belh leh a, kum 30 mi deuh vek an ni a, AA-ten sipai training tur an tih vanga rawn tlanchhia te an ni, tiin raltlan tanpuitu zinga thuneitu pakhat chuan a sawi a ni. Mizoram sorkar thuneitu lam chuan raltlan lo luh belh thu hi an la hriat loh thu an sawi ve thung.
Sorkarin a chhinchhiah dan chuan kar kalta Thawhtanni (April ni 29) thleng khan Mizoramah Myanmar raltlan 34,282 an awm a, an zinga mi 15,938 te hi relief camp hrang hrang 147-ah an awm mek a. Mi 18,344 te erawh chuan an chhungte leh thiante an belh bakah engemawzat chu mi in luaha khawsa te, an hnathawhna hmuna awm chilhte an ni a. Tun dinhmunah raltlante hi mi 10,899 chu hmeichhia an ni a, mipa 10,073 leh naupang 13,310 an awm bawk. Khawzawl, Kolasib, Saitual leh Serchhip district-ah te relief camp sak a ni lova, district dang 7-ah chuan relief camp a awm vek a ni. Siaha district chu relief camp tamna ber a ni na a; mi 3,888 chauh an awm a, a dawttu Lawngtlai district-a relief camp 36-ah mi 3,519 an awm. Champhai district, relief camp 23 awmnaah, mi 6,346 zet an awm thung a. Champhai district-ah hian Myanmar raltlan an awm tam ber a, an vaiin mi 14,499 an awm a. Siaha district-in dawtin mi 6,044 an awm a, mi 5,864 awmna Lawngtlai district-in a dawt leh a ni. Zokhawthar relief camp-ah raltlan an awm tam ber a, mi 3,290 zet an awm a, Farkawn khua-a relief camp-ah mi 1,426 an awm bawk.
