Ramri veng tute ngaihsakloah sorkar puh

ZPM chuan nimin khan thuchhuah siamin, “Tunhnaiah Saipum bula ramri vengtu sipai pahnih chu an tuichawi lai video viral avangin sawrkar-in a hrem nia sawi a ni a, hrem an nih chhan leh thil thlen dan thlirin sawrkar hian sipaite harsatna a chinfelsak lo zawk niin a lang. Ram himna tura vengtu sipaite hian a bika enkawlna an mamawh tehlul nen, an nitin khawsakna atana tul ngei ngei pawh ngaihtuahsak an ni lo fo hi ZPM chuan pawi a ti hle a. Heng sipaite hian dan anga thil tih sual an nei pawha a lanloh laia hrem an nihna hi a rang lama sut leh nghal turin sawrkar kan phut a ni,” an ti.
Thuchhuahah chuan, “Kan hriat angin Assam leh Mizoram ramri hi hun rei tak a buai tawh a, silai hial hmehpuah tawh a ni tawh. Heti chung hian vawiin thlengin Assam nena kan ramri buai chingfel tura hmalakna lian tham awm lo hi kan sawrkarin NEDA lama an thawhpuite a venthawn vang nge? Mizoram chhunga Assam lei dawh kan sawrkarin ngawirengin a thlir a, Assam Police duty post sawn tura tih sawn a nihloh avanga ram neitute tawrhna zozai hi engtinnge kan sawrkar hian a enliam theih? Chief Minister level-a inbiakna mumal neih hleitheih loh te hi ramri chinfel dan thuruk hmanga hmalak a ni zel nge? tih te hi kan zawt a ni. Ramri buai hi thawklehkhata chinfel mai theih a ni lo tih kan hria a, chuti chung chuan chinfel tumna tak tak a awm lo nia lang hian ramri chinfel duhna tak tak kan sawrkarin a neih lohzia a tarlangin kan hria a, tun aia chaka hmala turin kan phut bawk a ni.
“Hetiang hi kan dinhmun a nih mek laiin, ngaih pawimawh hmasak tur zawk ngaihthah a, mahni thuneihna uchuak taka hman kawngah erawh chet rum rum lehlawi si hi sawrkar tha zia a ni ngai lo a, hetiang thil hi thleng nawn tawh lo se ZPM chuan a duh hle a ni,” an ti bawk.