MPYCC chuan thuchhuah siamin, “Mizoram Legislative Assembly Session neih meka Congress Legislature Party Leader, Pu Zodintluanga’n Rural Development Department changtu Minister Pu Lalruatkima a zawhna; Border Area Development Programme (BADP) hna estimate atanga 25% a changtu Minister hnena pek zel ngai anga sawi awm fo hrilhfiah tura a zawhna chu, chhanna mumal tak a awm loh avangin sawifiah thuai turin kan phut a ni,” an ti.
Thuchhuahah chuan, “Mizoramin khawvel ramdang ramri a neihna hmun tih hmasawnna, BADP hnuaia hnathawh sum hmanna hlep khawnge a awm tia CLP Leader-in Assembly House-a RD Minister a zawhnaa a sawi zaunaah chuan, “BADP hna hi BDO, EE Directorate te hi a thawktu an ni thla vek mai a, henga pawisa hlepte hi khawnge a awm tak, Official level-a lar em em Mr. 25 percent-a tihte a ni a, henga pawisa hlepte hi Official atanga la letin engtin nge kan hman?” a ti a. BADP atana kum 2019 hnu lama sum kan hmuh cheng nuai 8077.55 khami hlep kha eng account-ah nge an dah? tiin a zawt a ni.
“Heng zawhna te hi RD Minister hian Assembly House-ah chhanna mumal tak pakhat mah a nei lo a, RD Minister hian BADP hnuaia hna lo kalte EE Directorate leh BDO te a thawhtir atang hian 25 percent chu a lo hauh reng em? Hnathawh atanga hlepte hi khawiah nge a awm? A hlep hi engtia hman nge a nih tih kan zawt nawn a, hna atanga 25 percent kal ralna hi rang taka mipui hriata puanzar kan phut a ni,” an ti bawk.
