Aizawl, May 24 : Rural Development Minister Lalruatkima chuan vawiin khan Block Development Officer te tana intuaitharna training, State Institute of Rural Development/State Panchayat Resource Centre (SIRD&PR), Durtlanga neih chu khuallian niin hawnna inkhawm a hmanpui.
Rural Development Minister Pu Lalruatkima chuan training a tel zawng zawng te chibai bukin State Civil Service te hian State hmasawnna leh hmalam hun atan pawimawhna thuk tak an nei tih hre thar leh turin kalkhawmte a fuih a. Sawrkarin Policy a duan te, Department hrang hrang kaltlanga hmachhawp a siam thin te hlawhtlinna atana thawktu chu sawrkar hnathawk te an ni, a ti a. Sawrkar tha leh tha lo, chak leh chak lo neihna kawngah “Policy leh Sawrkar kaldan tur tul ang duangtu Legislator te an pawimawh em em rualin a bawhzuitu sawkar hnathawk ten mawhphurhna sang tak in nei tih hi in hriat thar leh ka duh a ni”, a ti. Pu Lalruatkima chuan Central sawrkarin scheme hrang hrang a siam kalpui hnem ber chu Rural Development Department an ni a, scheme hrang hrang an kalpui dan tur leh chumi atana hriatna tha zawk an neih theihna tur atana, Refresher Course SIRD ten an buatsaih chu a lawmawm a, an thil zir chu hmasawnna hna thawhna kawnga puitu tangkai tak a nih a beisei tih a sawi a ni.
Khuallian chuan BDO te fuihin mipui rawngbawltu an nih ang ngeia anmahni dawrtu apiang tana biak nuam leh hawihhawm ni turin a chah a. Sawrkar fawng vuantu apiangte tana thawhpui theih ni zel a, mipui tana rin ngam, sawrkar leh ram tana theihtawp chhuah tu, mi rinawm leh mi taima, ram tana fahrin manhla ni turin a fuih a ni. RD Minister chuan Block Development Officer hna an thawh chhungin harsatna hrang hrang tawk thei an ni a, chung hun a lo thleng a nih pawhin an rilru ti paukhauh a, Pathian leh ram tana thawktu an ni tih theihnghilh lo turin a chah a. Training a chanvo nei tu zawng zawngte duhsakna hlanin, SIRD thawktute leh tha leh zung senga training a hlawhtlinna atana thawktu zawng zawngte chungah lawmthu a sawi a ni.
Training hi ni thum chhung neih a ni ang a. Sawrkar laipui scheme hrang hrang hriatzauna leh bihchianna hun hman a ni ang. Thupui thlanbik hmangin mi thiamten Mizoram chhunga Block 26 enkawltu BDO kalkhawmte hi an zirtir dawn a ni.
