Rural Development Minister Lalruatkima chuan vawiin khan East Lungdarah Buhzem Cluster Level Federation Office a hawng.
Buhzem Cluster Level Federation Office hi chhawng khat a sak niin, implementing agency chu BDO, East Lungdar RD Block a ni a. Cheng nuai 20 senga sak niin, a dung ft 40, a vang ft 30 a ni. 10.8.2022 khan sak tan niin 27.9.2022 ah sak zawh a ni.
East Lungdar RD Block hnuaia kalpui mek MzSRLM Scheme-ah hian chhungkua leh khawtlang tana hmeichhiaten tangkai zawk leh ei leh bar zawnna kawngah pawh rintlak taka hna an thawh theihna turin Self Help Group din a ni thin a. Heng SHG te hi khaw tinah Village Organization (VO)-ah an inthlungkhawm leh a. VO engemawzatte chu Cluster Level Federation-ah an inchhungkhawm leh a. SPMRM (Rurban) Scheme hnuaiah Mizorama a hmasa ber turin Buhzem Cluster Level Federation-te tan Office Building zau nuam tak sak a ni a. SHG-te tihchakna atan leh mumal taka an inhlawmkhawm theihna tur atana he Cluster Level Federation Office Building hi sak a ni a. He Buhzem Cluster Level Federation Office hi tihchangtlun chhoh zel tur niin SHG-ten tangkai taka an chhawr chhoh zel tur rotling a ni.
