RD Minister-in Taxi khalhtute a fuih

Aizawl June 6 : Mizoram Sorkar hnuaia Department hrang hrang SIRD, Traffic Police, Transport Department leh Mizoram Taxi Association (MTA) tangkawp buatsaihin vawiin khan Vanapa Hall-ah nithum awh tur, “Orientation Training for Taxi Operators/Drivers” buatsaih a ni a. He hunah hian Rural Development Minister Lalruatkima chu khuallian niin, training hi a hawng a ni.
Minister Lalruatkima chuan, mihringin zirtawp ni kan neilo a, kan hun hman reng rengah hriat belh ngai, zir belh ngai a awm reng a ni a ti a. Taxi operators te chu Mizoram hmel lanna an nih avangin vawiin a training buatsaih hi a phurawm a ni, a ti a. Mihring khawsak rel bawlah tu te pawh kan tul tawh tak zet a, vawiin a MTA member te training ngai pawimawh a an lokal avangin an chungah lawmthu a sawi tak zet zet a. Vawiin training ah hian enge kan zir chhuah ang tih rilru pu turin leh hmasawnna pakhat tal neih tum teuh turin a chah a. Khuallian chuan kalkhawm te hriatreng tur chu nunna hlu tak mai an kut ah a innghat a, fimkhurh loh vang leh inthlahdah a vang ten pawi sawilo in nunna an chan thei tih hria in, fimkhur kawngah theihtawp chhuah a rilru harh fim taka motor khalh a enkawl turin a chah bawk a ni. Minister chuan eizawnna huang chhungah danin a phal leh phalloh te hre reng turin a chah bakah, an thatna leh hawihhawmna te mipuiin an hriatreng thu leh, taxi khalhtu te rinawmzia pawh social media ah leh chanchinbu ah te tlangzarh fo a ni tih a sawi a. Ram changkang apiangah mipui phur bik an chawimawi a, mipui nen inhnaih taka eizawnna nei an nih avangin enge mipui tana him ngaihtuah zel turin leh eizawnna engpawh rinawmna nena thawh a nih chuan malsawmna a awm a ni a ti. Mizoram Taxi khalhtu te kan hawihhawm a, mamawhtu passenger leh kawng laka chhiattawk lo awm thut ah pawh a tlawmngai ber an ni thin chu fakawm a ti a. Mi te tanpui duhna rilru kan pu hi nunpui a, chhunzawm zel turin a sawm a ni. Hnamdang te biak chungchanga harsatna kan tawhloh nan kan inzir ve a ngaih bakah faina chungchangah pawh khawpui hmel lanna pakhat an ni a ti bawk a. Training chu nasa taka member tin te ti bengvartu leh hmasawnna thlen tu niturin, duhsakna a hlan a ni.
Training ah hian Core faculty, ATI Golda Dell Zohmangaihi chuan Manners & Etiquette zirtirna hun a nei a, Joint Director (STA) C. Lalbiakthanga chuan Motor Vehicle Acts & Rules: Documentation & Registrations a zirtir a; Additional SP Traffic C. Vanlalvena chuan Motor Vehicle Driving Regulatins & Responsibility chungchangah zirtirna a nei bawk a ni. MTA member 400 vel an kal a ni.