Bairabi – Sairang inkara rel kawng siamna atana ram an lak sak, zangnadawmna la dawng lo nia insawite chuan vawiin khan Aizawl Press Club-ah thuthar thehdarhtute kawmin, August, 2025 chhunga zangnadawmna pek an nih loh chuan an ram chin an hung tur thu an sawi.
Compensation la dawng lo nia insawite hian an ram chu an survey tawh bakah spot verification pawh an neih vek tawh thu an sawi a, ‘Compensation pek kan la nih loh chhan tak hi kan hrethiam lo. DC-ah kan kalin Railways-ah min tir a, Railways lama kan kalin DC lama kal turin min ti leh si. Kan dikna a tawp thlengin kan humhim dawn a, August chhunga kan dawng lo a nih chuan kan ram chin kan hung dawn a. Thuneitute’n theihtawp min chhuahpui se kan duh,’ an ti.
Compensation la lo ram 14 neitute chuan an ram chin an hung tur thu hi Aizawl DC leh Railways-ah bakah Prime Minister leh Railway Minister-a thlen an tum tih an sawi a, a theih ang anga hmalak an tum. Vawiina press conference nei zing ami Zothanpari chuan, Railways dawrin Delhi leh Guwahati-ah tum thum ve ve a kal tawh tih a sawi a, Rel kawng hawn a nih hmaa an chet ve tur thu a sawi bawk.
Sairang rel kawngin a tan tlanga ram nei compensation la ve lo te chuan Aizawl DC leh Railways lam chu an pawisa dawn tur chungchangah hian an inpuhtawn tih an sawi a, pawisa hi an pe thei lo a nih chuan pawisa an pek te ramah rel kawng chu suan mai se an ti.
Mi 14 te sum dawn tur hi Rs. 14,56,29,759 a ni an ti a. Rel kawng hi August 18, 2011-ah survey neih tan niin 2016 khan compensation hi a dawngte chu pek zawh an ni. Tuna compensation la dawng lo mi 14 te zingah hian mi pali chu chengkhatmah la dawng lo an ni a, a then hi chu an dawn tur zat la dawng lo te an ni.
Aizawl DC chuan he compensation an dawn tur ang la dawng lo te hi a kokhawm tawh a, inbiakna te pawh an nei a, August 19, 2025 hian an ram chu spot verification ti that sak tura thutlukna siam a ni a, mahse, dan pangngai anga file a kal leh anih chuan kum 2/3 vel a ngai leh dawn a, rel a rawn luh tawh dawn bawk si avangin an ngaihthah an hlau a ni.
