Dy. Chief Minister Tawnluia chuan vawiin khan, India sorkar leh MNF ten inremna thuthlung an ziah fel hnua Mizo Hnam Sipai, Arakan a awmte lo chûanchhuahna hmasa ber ‘Peace Camp’ sakna hmun Parva-ah MNF Diamond Jubilee puala siam ‘Remna Kawtchhuah Hriatrengna Lung’ phun a hawng.
Dy. CM Tawnluia’n Remna kawtchhuah lungphun a hawn zawh hian Parva-III Community Hall-ah Vantlang inkhawm neih a ni.
Tawnluia chuan, ‘MNF kum 60 tlin lawmna kal meka thil chhinchhiah turte leh hriatrengna lung phun buaipuitute chungah lawmthu a sawi a.
MNF Senior Vice President chuan, Kum 1961-a MNF din a nih khan thil tum a nei a. Zohnahthlak zawng zawng te zalenna sang tak nei a ‘Rorelna pakhat hnuaia awm tura hmalak’ chu a tum lian ber pakhat a ni tih sawiin, kum 1964-ah MNF Volunteer 22 ten Pu Laldenga te ruahmanna in Chittagong bulah training an nei a. Anni chuan Silai leh a mu thahnem tak akin Mizoram an pan a, Mizoram an lo luh hmasak berna Parva daiah hian an ralthuam te an thukru ta a. Khawtlang mipui tlemtein an hria a, “India sorkar in a hriat loh nan in lo hum a, Mizoram Independent sualna kawngah Parva hian tha in thawh nasa in in pawimawh em em a. In chungah lawmthu ka sawi a ni” a ti.
MNF Senior Vice President chuan, ‘Remna Kawtchhuah Hriatrengna Lungphun chu a pawimawh tih sawiin, thangthar zelten,’tun hma khan kan nula tlangvalten Independent an sual tawh a ni tih leh mipuite ngenna angin Inremna hnuaiah helaiah hian lo chuang chhuakin an ralthuamte an lo tung ta a ni tih’ an hre thei dawn a ni a ti.
Dy CM Tawnluia chuan, ‘SEDP first installment kan sem tawh a, 2nd installment hi kan pe leh nghal mai dawn a. Nakkumah kumina pek zat chiah hi a thar hlak kan tuam leh dawn a ni. Nakkum tawp inthlanpuiah sorkarna kan lak leh hunah midang pawh kan pe zel ang’ a ti.
