Mamit April 19 : Vawiin khan Pu K. Lalrinliana, Hon’ble Minister, Food, Civil Supplies & Consumer Affairs, Local Administration, Fisheries chuan Rengdil leh Tuidam khua-ah Supply Godown sak thar chu khuallian niin a hawng.
Khuallian chuan hrileng avanga mipuite harsatna hria-in Sawrkarin a thlawna buhfai a sem thin chu AAY leh PHH te tan kumin September thla thleng sem chhunzawm a nih dawn thu a sawi a. Mizoram-in Gas hnianghar tak kan neih theih nan chak taka hmalakna kalpui a ni a, nikhata truck trip 15 thleng thin kha tunah chuan truck trip 24 nitin harsatna dang a awm loh chuan kan dawn thin thu a sawi. Mualkhang Gas Bottling Plant tih changtluna, Gas chhekkhawlna turin hmalakna kalpui a nih mek thu a sawi bawk. Supply Minister chuan kumin furpui hma-in Mizoram chhung Godown 79-ah thla 3 atanga thla 6 tla tur buhfai chhekkhawl a nih thu sawiin raltlan mi 15981 te hnenah buhfai 950 qtls lai Sawrkarin tanpuina a pek tawh thu a sawi bawk.
Minister chuan Rengdil leh Tuidam khua-in Godown thar tha tak an nei chu a lawmpui thu sawiin fur khua-ah pawh buhfai him tha tak an neih ngei a beisei thu a sawi a, a enkawl zui kawngah neitu rilru pu turin a chah bawk. Mizoram Sawrkar Flagship Programme SEDP hnuaiah 1st Installment mi 60000 thlanchhuahte hnenah pek an nih dawn thu sawiin a hlawhtlinna chu a dawngtu mipuite-ah a innghat dawn a, eizawnna ngialnghet din ngei nana kan hman a tul dawn thu a sawi bawk.
Rengdil Godown hi a dung 50ft, a vang 34ft, tehkualin 1700 sq.ft a zau a ni a, Rengdil Godown-ah hian 250 MT leng tur a ni a, a sak tan hna hi 20.11.2020-ah thawh tan niin 25.02.2022-ah zawh fel a ni. Godown bakah hian Staff Quarter chhawng 2 leh Toilet bakah Approach Road- te a keng tel a ni. Tuidam Godown hi 250 MT leng tur niin Ni 20.11.2020 a sak tan chu Ni 25.02.2022-ah zawh a ni, a dung 50 ft leh a vang 34ft, a zauzawng hi tehkualin 1700 sq.ft a ni, Staff Quarter chhawng 2 leh Godown dawrtute hman tur Toilet a keng tel bawk. A sak hna hi Babie Construction & Consultancy Service (BCCS) Upper Khatla te thawh niin Construction of 21 Warehouses and its related Infrastructures in 07 Districts of Mizoram Under Warehouse Infrastructure Fund (WIF) under NABARD Warehousing Scheme (NWS- 2013-14) hnuaia sak a ni a. Mizoram chhung hmun hrang hrang 21-ah Godown leh a kaihhnawih sak nan hian 39,61,81,000 ( Thirty nine Crore Sixty one Lakh Eighty One Thousand) hman a ni.
