Lalruatkima Revenue Minister chuan vawiin khan a office-ah Peace Accord MNF Returnee Association (PAMRA) hotute lengah sawmin a kawm.
Lalruatkima chuan, “He hnamin dinhmun sang tak kan neih theihna tura zalenna sualtu hnam pasalthate in inpekna kan hrereng a. Mizo hnam thinlungah hian zalenna mei a mit lo a, thangtharte pawh hian zalenna rilru an la pu reng a. He hnam hian engtik niah emaw chuan zalenna famkim kan la nei ang a, rorelna pakhat hnuaiah kan la awm ngei ang tih hi ka ring tlat a ni,” a ti a. “Zalenna atana in meichher chhit nationalism hi a mit lovang,” a ti bawk.
Minister chuan zalenna suala rammu lo hawte tan Maumualah In hmun 686 ruahman tawh chu hmalak mek zel a nih thu a sawi a.
“Maumuala In hmun ram in neihte a theih ang angin cheibawl turin pawisa kan dil a, kan hmu hlauh mai a. A tul ang anga chei bawl hna kan thawk tan mek a, hmalak mek a ni,” a ti.
Lalruatkima chuan Pu Zoramthanga kaihhruai MNF party chu Pathianin Zoram tan a hun takah a hungchhuak tih a sawi a. “Ramri buai, lirnghing, hripui, vawkpul hri leh chhan hrang hrang avangin kan buai a. Zoram mai ni lo, khawvelin hun harsa tak kan hmachhawn a ni. Kha hun harsaah khan dam khawchhuah tumin kan bei a, kan dam khawchhuak ta a ni,” a ti.
B. Zorampara, PAMRA President pawhin thusawiin, PAMRA member chu mi 500 chuang an nih thu a sawi a. “Sorkar-in zalenna sualtute ram a pek tuaihnum kawnga hma min laksak hi kan lawm tak zet a. Kan ngaih pawimawh em em min ngaih pawimawh sak hi kan lawm a, hma min laksak chhunzawm zel turin kan ngen nghal bawk a ni,” a ti.
Minister hian PAMRA hnenah hian Computer set a hlan bawk a ni.