Vawiin August 29, 2023 (Thawhlehni) hian Mizoram Pradesh Mahila Congress Committee buatsaihin hla thlan bik pahnih ‘Ro min rel sak ang che’ tih leh ‘Kutphah mawi’ hla hmangin Aizawl City Block Mahila Zaipawl intihsiak, Lal Thanhawla Auditorium, Congress Bhawan-ah neih a ni a. He hunah hian MPCC President, Lalsawta leh MPMCC President, Vanlalawmpuii Chawngthu ten an hmanpui.
He huna thusawitu Lalsawta, President MPCC chuan, Ram rorelna atan pawha min hruaina hlâ tura kan duh ber hla hmanga Mahila te’n intihsiakna tha leh thianghlim an buatsaih chu a remhriatthlakin a vanneihthlak, tih sawiin, Mizo hmeichhe tumruh leh a ngaihna hriate hi kan ram ro hlu an ni. Hmeichhe tha hian ram leh hnam hmelhmang a thlak hlawk thei a ni, a ti.
Lalsawta chuan, Kumin MLA General Election-ah ramin hma a sawn ngei ngeina tur kawng kan thlan a ngai. Kan mihring nuna kan hnam himna tur leh thih hnu piah lam ram thlenga min thununtu kan sakhaw humhimna turin Congress Party chauh hi tuna kawng awmchhun a ni, tih sawiin, “Sakhaw zalenna rawn duh thar vetu Party dangte nen he thlarau indonaah hian hnehna chang turin Congress Party chuan hma a la zel dawn a ni,” a ti bawk.
MPMCC President, Vanlalawmpuii Chawngthu chuan, Ram leh hnamin a mamawh chu nu tha leh hmeichhe tha a ni a. Hmeichhiate hian hnam hmelhmang nasa takin a tha zawngin a ti danglam thei. Kan ram leh hnamin kawng dik a zawh theihna turin kan fate rilru pawh fimkhur takin kan thunun tur a ni. Kan ram dinhmun kan hria. Kan hnam leh kan sakhua a him lo hle a. Hetiang laka kan ram, kan hnam leh sakhua an humhim theihna turin Congress Party bak tunah hmanrua kan nei lo tih hi kan fate pawh zirtirna kan pe tur a ni a, kan hneh tur a ni, a ti bawk.
Vawiin Mahila Zaipawl intihsiakna hun hi Pi Lalremsiami (Lapuii), Vice President MPMCC in a kaihruai a, Pi Zodingpuii, Treasurer MPMCC leh AMC Ward No. XV Corporator ni bawkin zaipawl intihsiaka telte chungah lawmthu a sawi bawk a ni.
