RO MIN RELSAK ANG CHE : Michael Lalmanzuala

Kan sawrkarin thutlȗkna a siam angin sikul inhawng țan leh tâte chuan, ‘Ro Min Relsak Ang Che’ tih hla sain bul an țan ta a. Sawrkar thupuanina sikul tin inhawng an tih erawh a dik chiah lo; ‘private school’ la inhawng lo an awm nual a ni.
Puipunna hun tin tih theiha program țan nana Hunserh kan nei țhinin țangkaina tak a neih kan hriat loh laia hetiang hlasak hun an han hmang leh ta hi eng nge a țȗlna ni ang le?
Pathian hnena inhlân tiin khȗnkhân takin Hunserh kan hmang a. A hnu-a kan thiltihah Pathian hriatzuina nei lo lệkin A duhzawng ni lovin Kan duhzawng deuh vekin kan khawsa leh si țhin. Assembly House hi chutiang tihdan lanchianna ber a ni hial ang. “Ka phuah chawp a nih kha”, “Bye Bye…” tih ringawt te pawh khan kan hunserh hmanin awmzia a neih lohzia chiang takin a lantir a ni.
.
Pathian leh kan Ram tân ti a, Hallelujah chorus-a bul tân khan eng nge rah țha a thlen? A sak zawmna lam hi a pawimawh lehzual. “Aw Pathian nang Lalber i ni” tiin kan sakzawm em? Lalber i ni ti chung zela, “Ro min rêl sak ang che” tih chhunzawm zel a la ni cheu.
Rorelna dik chu luipui kang ngai lo angin luang se kan ti tak tak a nih si chuan, dan ni lo hi dan ve reng emaw ti lovin, dan hman pawh ngai lo khawpa, thu awih té hi ni zâwk ila. Chuti lo chuan, Mi piangthar, Vanram ringawt ngaihtuaha, a kal kawng hlamchhiah leh si te kan ang thei a ni.
Ration mai mai la tur pawhin, mahni ngei kal a ngai a nih si chuan, contract thawk tur phei chuan Contractor ngei ni se, khawvar kan hnaih sawt ang. Chu ngei chu ‘Ro min rêl sak ang che’ tih bul țanna chu a ni si a.
Pathian fakna hla a ni emaw, Ram ngaih hla a ni emaw, kan hlasak țhinte hian eng nge maw țangkaina an neih țhin rệng le? Kan sawi fo tawh țhin angin kan ram hi Corruption Kairualna ber a nih reng a, Natna Ṱihbaiawm puiina a bawm nasat ber kan nih reng si chuan, kan țawngțai te, kan hlasak te, kan thusawi te hian țangkaina an nei lo tihna chu a ni mai lo’m ni?
Zirna tihchangkan dan țha ber chu hlasak ngaih pawimawh aiin Zirtirtu țha neih a ni zawk tih te hi engtikah nge an hriat ve dawn? Zirtirtu lâk rȗnpui a awma, party leh mimala duhsak zawng lak tur chinfel nana thla ruk chhung zet an han hmang țhin te hi an sim hma leh, Aikal lak leh Attached-a awm an tihbo hma chuan Zirna tihchangkan tumna tak tak an nei lo tih an lantir reng zawk tihna a ni ang. A thawk lai hlawh pawh pek theih mang loh laia za chuang zet lak thar han tum leh rih te hi, Aikal lak, Attached-a awm, zirlai pakhat awmna-ah zirtirtu pasarih an awm tih angreng te nena thil inhmeh lo tak chu a ni e.
Sawrkar hnathawk, a hun tak, zing dar 9 emaw, dar 9.30 emawa kal thlap thlap awm ngai mang lo, dar 10 pelh hnu-a kal țhin, dar 12 vela kal țhin te pawh an awm chhung hi chuan, sikul țan hma-a Ro Min Relsak Ang Che tih hlasak hian Darbenthek ri pawh a tluk lo vang. Zaipawl, Zaithiam langsar chinte inthuamna changkanzia leh mantozia te hi engtia sawizawm tur nge ni ang? Tu ena, tu ngaihsan atana an tih nge ni ang? Lal Isua ena ngaihsan atana an tih chu a ni lovang ti ru’?
Hetiang thil an leina pawisa te hi khawi ațanga lokal nge ni ang? Anmahni emaw, an nu leh pate emawin thlansa phȗlkâia an thawh chhuah ațangin em ni? Nge, Budget pawisa 80% vel a hman lohna tura hman, kawng bo siper ațang zâwk te-in?
Sawrkar a ni emaw, Kohhran an ni emaw, eng vanga Thatchhiat Theology hawizawnga kalphung nei nghet reng hi nge an nih? Lal Isua duhzawng, Inngaihtlawm leh A tiha tih hi eng vanga tuipui ve thei miah lo nge an nih? Pathian duhzawng aia Mihring duhzawnga kal reng mai hi engtikah nge an sim dawn?
Mipui Lal berna sawrkar kalphunga Chhiahhlawh intite an lal ber zawk reng te pawh hi engtia sawifiah chi nge a nih? Hunserh hmangtute lehzel pawh Lal dan indawta an inruat țhinte hi Lal Isua anna a ni em? A lian hlel hlel, a thiam thiam, Rev. Dr. Upa te țawngțai hi englai khan nge Lal Isuan mi hnuiahnung zawkte țawngțai aia a ngaihsan zawk thu a sawi?
Kan Lemchan Nun nasa lutuk hi țhangthar nun ning, Ṱhasiama kha lo tho leh se, kan nun hohzia hi rawn hmu se, F. Laltuaia iangin ‘Vawi Sawmpathum a thih nawn’ kan ring ve mai lo’ng maw?
A pawi ber mai leh a huatthlala lai ber mai chu, An Thiltih apiang POLITICS BAWLHHLAWH KHELH nana an hmang zel hi a ni.
Mit nei chuan hmu ila, Beng nei chuan hria ila, Lemchan ching te, Dawtsawi hrât te hi i ensan ngam tawh ang u.