Tripura state ah hian Olympics Associations 2 awmin kum 15 zet sports discipline hrang hrang ten harsatna an tawk tawh a,Olympic association pawh kum 15 an inthlang tawhlo a ni. India rama sports inelna lian National Games ah pawh an tel theihlohna a rei tawh hle.
Tripura sorkar leh infiammite bakah mipuiin dan ang taka din Olympics Association ding ve se an duh a.Dr PT Usha (MP) & IOA President chuan Tripura a sports hmasawnna mumal taka a kal ve theihnan a ngaihtuahtu tur IOA Adhoc Committee on Tripura a din ta a.Chairman ah John F.Kharsingh,Working President of Meghalaya Olympic Association,Co-Chairman,State Planning Board niin Members 2-Robert Romawia Royte,President MOA&MLA Mizoram leh Bamang Tago,Secretary General APOA leh Member Arunachal Human Rights Commission te an ni.
He Adhoc Committee hian Tripura vawi 3 tlawhin a tul angin an chamchilh a.CM,sports Minister,Sports Secretary,Director leh State level sports associations zawng zawngte kawmin sports veterans leh Arjuna Awardees tepawh an kawm bawk.
IOA Adhoc Committee hian IOA a an Report an thehluh hnuah IOA chuan an term pawtseiin Tripura Olympic Association Dan thar te siamin Election zawh thlenga thawk turin a ti a.ToA Constitution leh tul dang zawng zawng an siam zulzuiin ToA Election pawh neih a ni ve ta a.Tichuan Tripura chuan Tripura Olympic Association a nei thar leh ta a.Hei hi IOA pawm awmchhun niin Tripura ah Olympic association dang awm a thiang tawh lo.Discipline state level associations zawng zawng pawh he ToA hnuaiah hian an awm vek tawh a ni.
Nimin 23/5/2025 khan IOA Adhoc Committee Chairman John F.Kharsingh an TOA hruaitu tharte Rinawmna thutiam tirin Tripura Sports Minister Tinku Roy a pawhin IOA President Dr PT Usha tumruhna leh IOA Adhoc Committee on Tripura hnathawhte a faka,TOA thar lo ding leh chu lawmawm a tih thu a sawi.
He hunah hian IOA Adhoc Committee Member Robert Romawia Royte pawhin thusawiin Tripura Olympic Association rei tak a buai hnua alo ding thar leh ta chu lawmawm tiin Hruaitu thar Olympian Dipa Karmakar kaihhruai chu a lawmpui thu a sawi a,sports discipline associations zawng zawngte leh infiammite pawh phur taka Olympic movement ah tan la thar turin a fuih bawk.Mizoram Olympic Association aiawhin lawmpuina a hlan bawk a ni.
Tripuraa Olympic association mumal tak a din leh theihnan hian an CM Dr Manik Saha leh Sports Minister,Sports Secretary,Director leh TSSC te hian theihtawp an chhuah a.Tripura Sorkar hian IOA in he mawhphurhna a pek John F.Kharsingh(Meghalaya),Robert Romawia Royte(Mizoram) leh Bamang Tago(Arunachal Pradesh) te hnenah an ruahmanna anga TOA dinthar anih leh tak avangin Lawmthu sawina Citation an hlan a ni.
Agartala Mizo Welfare Association hruaitute pawhin MLA Pu Robert Romawia Royte hi kawmin an harsatnate an thlen a.Hachhek bialtu MLA chuan Hnam thuam engemaw zat a pek tur thusawiin AMWA te chu sumfai tanpuina a hlan bawk.
