Mizoram election department chuan Tripura a inbengbel tawh Mizorama vote nei, Tripura state election commission-in Tripura electoral roll-a an thun tawh Bru ho hming paih hna hna chu tunlai hian a chawlhsan rih.
Thudawn danin electoral roll intensive revision kalpui mek a nih avangin Bru vote nei hming paih hna hi chawlhsan rih a ni a. ERONet hmanga Tripura state election commission-in Tripura electoral roll a Bru vote neite hming a thun, Mizoram election department hnena lo paih tura a rawn hriattirna pawh tihtawp rih a ni. Electoral roll ennawn mek hi vawiin khan ‘draft roll’ tih chhuah a ni a, nakum January ni 13 khian electoral roll thar hi puanzar a ni dawn a ni.
Mizoram electoral roll a chuang ţhin, Tripura-a an inbenbel tak avanga Bru vote nei hming paih tawh zat hi 1,992 a tling tawh a. Hriat theih chinah Tripura state election commission hian Bru vote hi 6,052 a thun tawh a, he’ng zinga 5,000 chuang hret hi Mizorama vote nei ţhinte an nih laiin a dang zawng chu Tripura a an inbenbel hnu a kum tling vote thei thun tharte an ni.
Kum 2018 Mizoram assembly inthlan lai khan Tripura a awm si, Mizorama vote nei Bru 11,000 chuang an awm a. Kum 2020 January ni 16-a Sorkar laipui, Mizoram leh Tripura sorkar bakah Bru pawl hrang hrangte inremna angin Mizorama kir duh lote chu Tripura a an inbenbel phalsak an ni a. Tripura electoral roll a an hming thun apiang Mizoram electoral roll aţanga lo paih ve nghal zel a ni.
