RTI zawhna chhang ngam lovah Chief Minister puh

Vawiin ni 2, August 2022 Thawhlehni chhun dar 12:30 khan MPCC Vigilance Cell chuan an chairman C. Ngunlianchunga MLA hovin Account & Treasury Dept in RTI an chhanna an lungawi loh vangin Chief Information Commissioner Lalnunmawia Chuaungo chu a office ah an hmuin Complaint an thehlut.
MPCC Vigilance Cell chuan, “Kan hriat theuh angin Mizoramin sum harsatna namenlo kan tawk a. Treasury te pawh eng bill mah pass thei lovin tunah hian an awm mek a. Hetiang a mipui kan harsat lai hian engvanga sum dinhmun harsa ta em em nge kan nih tih te, CM thurualpui nia sawi contractor Kamrula te hian bill payment ah harsatna an tawk ve em tih te hriatfiah kan duh a, Mizoram Treasury Office hrang hrangah contractor leh supplier ten bill an lak dan chipchiar deuha hre turin MPCC Vigilance Cell Secretary Lalhruaitluanga Bawitlung chuan Directorate Account & Treasury SPIO hnenah zawhna RTI hmangin ni 15 July 2022 a thehlut a.
“Chu RTI chu, Mizoram Treasury hrang hrang a cheng nuai 100 chunglam bill nei te :- 1. Contractor leh supplier hming leh address
2. Contract leh supply hna hming
3. Contract leh supply hna estimate zat leh payment pek tawh zat
4. Treasury ah bill a thlen hnuin ni engzah ah nge pass a nih
5. E-Payment a nih chuan a luhna account neitu hming leh address.
“RTI a zawhna hi fiah lo takin an rawn chhan avangin thudik zep an tumnaah kan ngai a. Chuvangin, ni 18 July 2022 khan Thuneitu sang zawk hnenah thlenin appeal siama RTI zawhna te chhang ngei tura ngenna siam nawn a ni a.
“Chu appeal chu heng zawhna chhanna tur hi Account & Treasury Deptt. hian record an neih loh avanga chhang thei an nih loh thu ni 27 July 2022 khan hriattir kan ni ta a. Hei hi thudiklo, bill la tur leh payment an pek turte zawng zawng amount, name of contractor & Address hi felfai taka Treasury officer ten record kawl vek nia kan hriat avang leh, sorkarna kan lo chelh ve tawh chhunga experience neite kan zawh atanga kan hriatdanin, department ten RTI an chhanna hi dik tawklo awma kan hriat avangin RTI thuneitu sang zawk, CIC ah kan zualko ta a ni.
“Engvangin nge, Treasury a bill la te lakzat te, bill an dawn atanga ni engzatah nge bill pass sak annih hi zep an tum? Engatinge thudik lova RTI zawhna an chhan tih hi, Accounts & Treasuries Department enkawltu, Finance Minister, CM nibawk Pu Zoramthanga hi MPCC Vigilance cell chuan kan zawt a. Tu emaw bill Treasury a tlang bik em em nia an sawi kan chhui mek hi mipui hriat a hlauh vang em ni? An sawi ang hian ama unaute sum a kawl ang khan, Kamrula nen hian account an lo in?awm tak tak em ni tih hi kan zawt nawn a. A department enkawl hian RTI hi dik takin min chhang thuai turin kan phut tlat a ni,” an ti.