Chief Minister Pu Lalduhoma chuan pianphunga rualbanlote chu Theihna danglam bik nei an ni a ti a, hmasawnna mil zela an theihna hai chhuahpui chu mi tin mawhphurhna a ni a ti.
Khawvel puma Rualbanlote ni (International Day for Persons With Disability) 2024 puala a social media facebook account kaltlanga Rualbanlote Ni chibai a bukna ah he thu hi sawiin, Chief Minister chuan mitin te mahni theihna zawn theuhah rualbanlote theihna hai chhuahpui tur leh huapzo leh awmze nei zawka tanpui turin a sawm a, Sawrkar chuan zirna in tam takah Rualbanlo naupangte tana chet awlsam zawkna tur hmanrua a siam a, special educator te pawh mumal leh awmze nei zawka hman tangkai dan a dap mek tih sawiin an tana hmalak theihna awm apiangah hma a la zel dawn tih a sawi.
Chief Minister chuan rualbanlote chu Mizoram sawrkarin a thlahthlam dawnlo tih sawiin theihtawpin a tanpui zel dawn a ti bawk.
Rualbanlote Ni pual hian vawiin khan Mizoram hmun hrang hrangah hun hman a ni a, Aizawl ah chuan Directorate of Social Welfare and Tribal Affairs, Federation of Mizoram Disabled Organisation (FMDO), National Institute for Locomotor Disabilities, Regional Centre Aizawl tangkawp buatsaihin World Disabled Day hi Zarkawt Recreation Centre ah hman niin SW&TA Minister Pi Lalrinpuii’n khuallian niin a hman pui.
Pi Lalrinpuii chuan, tun hma lamin rualbanlote chu chhawnchhaih leh nuihza siam nan te hman an ni thin a, an dikna leh chanvo ngaihsak an nih ngaihloh thu sawiin tun hnuah erawh Mizoram sorkar in chak taka hmala in Person with Disability wing hnuaiah Commissioner neiin rualbanlote hamthatna tur ngaituahin hma nasa takin lak a ni a ti a. Mizoram sorkar hnuaia hnalak ah pawh rualbanlote tan 3 persons reservation a awm tawh thu sawiin pianphunga rualbanlote pawn sorkar hna an thawk thei tawh chu hmasawnna ropui tak a nih thu a sawi.
Pi Lalrinpuii chuan rualbanlote chu an rualbanlohna te chhuanlama hmang lovin, an mahni fuih kaltu leh ti chaktu a hmanga hmasawn tum tlat zel turin a chah bawk.
