Tlawng luia tla naupang ruang hmu: A pa Mafaka ruang erawh hmuh hnuah lakchhuah hmain hloh leh a ni
Kumin August 2 tlaia an car pakhat Tlawng luia tlaluta chuang Malsawmkima (10) ruang chu August 17 zing khan a ruang hmuh a ni a. An chuanna car khalhtu a pa C Lalfakzuala (Mafaka) ruang chu zawn zui zel a ni.
Mafaka ruang hi vawiin (Ni 17, Aug. 2022) chhun dar 12 leh dar 1 inkar vel khan Tlawng leh Lengpui lui infinna lai vel ah tuia a rawn lang hmuh a ni a. A chinchang ngaihven zui nghal nimahse, tun thleng hi chuan hmuh zui a ni ta rih lo. A hmutu hian ruang a ni ngei tih erawh a confirm a, lui dung hmun hrang hrangah zawn chhunzawm mek zel a la ni. Mafaka ruang nia hriat rawn lanna lai hi chawhma lama a fapa ruang rawn lanna aṭanga hnaite metre 50 emaw vel chauh niin Sairang Dinthar YMA lam chuan an sawi.
Thudawn danin, vawiin (Nilaini) zing dar 9.30 vel khan Buichali lei bulah huan kal tur ten tui tla ruang an hmu a, a hmutute hian Sairang Dinthar YMA hruaitute hrilhin chawhma dar 10.00 velah Changsil Kaiah ruang hi lo dan niin lakchhuah a ni. Naupang ruang a ni a, August 2 tlaia car chesual, Tlawng luia tla taa chuang Malsawmkima ruang nia rin a ni a, an awmna veng Chaltlang Lily atangin chhungkhat leh khawtlang hruaitute an kal bakah Sairang Police pawh a hmunah an kal nghal a, Malsawmkima ruang a ni ngei tih finfiah a ni. Sairang PHC-ah post mortem a nih hnu in an vengah lak a ni a, Nizan dar 6.00 khan vui a ni. An tlakna atangin ruang hmuhna hi km. 4 vel a ni.
Vawiin vek chhun dar 12.00 leh chawhnu dar 1.00 inkar vel khan ruang Tlawng lui leh Lengpui lui infinna lai velah ruang nia hriat hmuh thu sawi a awm leh a. Malsawmkima pa C Lalfakzuala ruang nia rin niin a chinchang ngaihven zui nghal a ni a, a hmutu hian ruang ni ngeia a sawi laiin, hmuh tur a awm zui loa, theih ang anga umzui a ni. He chanchin buatsaih lai hi chuan ruang nia hriat hi hmuh zui a ni rih lo a ni.
Tarlan tawh thin angin kumin August 2 khan Sihhmui lei piah lawka picnic-naa kalte chu an haw lam tlai dar 6.00 velah Sihhmui lei bulah hian chesualin car pakhat a tlanliam a, he car-a chuang mi pahnih chu dama lakchhuah niin a dang pahnih hi hmuh zui an ni ta lo. Pafa an ni a, car khalhtu leh a hmaa chuang an ni. A fapa Malsawmkima ruang chu an tlak atanga ni 15 hnua hmuh a nih laiin C Lalfakzuala ruang hi zawn mek ala ni.