Nichin dar 11:00 vel khan Serlui, Lungleng kai ah PHE Monitoring station a duty ten hmeichhe naupang ni ngeia hriat ruang chhe tawh tak.an hmu a. Ni 28.5.2024- a khuarel chhiatna avanga la bo mek Deborah-i, Hlimen a ni thei em tih finfiah turin a hrechiangte an thang mek a ni.
Ni 28.05.2024(Thawhlehni) a ruah sur nasa tak avanga Lei tawlhin a hnawl mitthi ruang la hmuh loh 5 te zawn hna hi nimin lam khan a kharna hun hman a ni.
Prof. Malsawmliana, General Secretary, Central YMA in Report a pe a. Report a a lan danin hetiang hi nunna chan te dinhmun a ni.
1. Aibawk – mi 2 an thi a , ruang pakhat la hmuh loh a ni
2. Falkawn- Mi 2 an thi a, hmuh tawh an ni
3. Kelsih – mi 1 a boral a, ruang hmuh tawh
4. Lungsei – ah 1 a boral a, ruang hmuh tawh
5. Salem Veng- mi 3 an thi a, ruang hmuh tawh
6. Hlimen – mi 6 an thi a, hmuh vek tawh
7. Melthum – mi 19 an thi a, ruang hmuh loh 4 an awm, hliam -1
Melthuma ruang la hmuh loh te chu :
1. Deborah Lallawmawmi(11)
2. Lalthakima(42)
3. Lalvenhima(8)
4. Ramdinsanga(Thla 6)
A pumpuiah mitthi zawng zawng -34 ( Mizo-26, hnamdang-8); ruang hmuh loh -5
Ruang zawn kharna inkhawmah hian Hlimen leh Melthum Branch YMA aiawh ten thu an sawi a, ruang la hmuh loh chhungkaw pahnih aiawh ten thu an sawi bawk.
Inkhawm kaihruaitu Pu Lalhmachhuana, Central YMA President chuan, chhiatna thleng avang nunna chan te leh chhiatna tawk chhungkua zawng zawngte Central YMA in a tawrhpui thu a sawi a, chhiatna kara Mizo tlawmngaihna lo lang chhuak thin chu ropui a tiin kan inngaihsakna ropui tak avangin lawmthu a sawi bawk. Ruang la hmuh loh te chu engtikah emaw kan hmuh leh ngei a beisei thu a sawi.
He hunah hian Melthum leh Hlimen khawtlang mipuite bakah Branch YMA hnatlanga thawk chhuak te, CYMA hruaitute, DM& R Department hotute leh Sawrkar Dept.dang hotute an tel bawk.
Prof. Lalnuntluanga, Vice President, Central YMA in lawmthu sawina hun a hmang.
Vawiin tlai dar 3-ah khan Aibawkah ruang zawn kharna hun hi buatsaih a ni bawk a, hetah hian Central YMA hruaitute an tel bawk. Aibawkah hian Pu Matthew Lalchhanhima (34) ruang la hmuh lo a ni.
