Ruihhlo Hmansual leh Tawlhruk Dona Ni ah Foundation For Drug-Free Mizoram chuan Ruihhlo laka mitinte fihlim tura ngenna neiin; zingkarah mini marathon an buatsaih a. Hemi hnu hian nilengin Aizawl khawpui veng hrang hrang ah Rally beihpui an thlak. Zingkar mini marathon hi Mizoram Journalist’s Asscociation President Pu C. Lalrambuatsaiha chuan a hmanpui a, mini marathon a tel te hi Vanapa Hall kawt atangin a vailiam.
Millenium Centre kawt, Dawrpui ah vantlang inkhawm hman zui a ni a. Rev. Dr. L.H Rawsea, ATC chuan hunserh hmangin he pawl dintu Tv. V. Lalnunthara (Mathara) chuan kohna dawnga he pawl hi din anih thu leh rawngbawlna hmun anih avangin; ruihhlo tel lo nun duhawm zawk nei tura naupang leh thalaite fuih hna chu an kalpui tih a sawi a.
Khualtha sawm te atangin Excise & Narcotics department a Assistant Commissioner Pu Peter Zohmingthanga chuan ruihhlo dona kawngah thudik hriat a tul thu leh ruihhlo do dan kawng chak leh tha zawk zawn a tul thu a sawi.
Central YMA Finance Secretary Pu Roneihthanga leh Cricket Association of Mizoram Treasurer Pu Zosangliana te pawhin thusawiin; damdawi khehpuama inti lian te kan ngaihsan loh a hun thu an sawi bawk. Chhun lamah Aizawl khawlai veng hrang hrang fangin; Bawngkawn atanga Kulikawn thleng Rally an nei a; kawn zau lai apiangah ruihhlo laka fihlim tura ngenna siamin; hun an hmang a. Vengtina Local Council leh tlawmngai pawl YMA, MUP leh MHIP hruaituten an lo tawiawm a ni.
Foundation For Drug-Free Mizoram hi kum 2019, April ni 1 khan Dawrpui a V. Thanga Street ah din a ni a. Tunah hian member 700 an nei mek a; kum thum chhung hian zirna in leh sunday school 30 tlawh tawhin; naupang leh thalai mi 7,000 chuang te hnenah ruihhlo tel lo nun duhawm zawk nei turin zirtirna an pe tawh a, he rawngbawlna a tui apiangte an pawla inziaklut turin an sawm.
